Eshtë arrestuar Sokrat Vata, autori i dyshuar i vrasjes së turistit 20 vjeçar nga Franca, në orët e para të mëngjesit të sotëm (18 gusht) në një nga plazhet e Ksamilit. Viktima u gjet i pajetë rreth orës 05:15, në shezlongët e plazhit, para lokalit ‘Principotes’ në zonën bregdetare të Ksamilit.
Syri mëson se autori 29 vjeçar nga Hasi u arrestua në Levan të Fierit. Policia kishte ngritur pika kontrolli për arrestimin e autorit pasi dyshohej se ai mund të ishte larguar drejt vendlindjes.
Gjatë kontrolleve të automjeteve, policia ka ndaluar një makinë e cila drejtohej nga një vajzë, dhe brenda në bagazhin e makinës u gjet i fshehur Sokrat Vata, informon gazetari i Syrit, Fatjon Gjinaj.
Burimet bëjnë me dije se vajza e cila drejtonte makinën dyshohet se ka qenë dhe shkak i konfliktit që i mori jetën 20 vjeçarit Miguel Mendes.
20 vjeçari francez ndodhej në Ksamil së bashku me një grup francezësh të ardhur për turizëm në Ksamil. Ndërsa autori, 29 vjeçari Sokrat Vata ishte i punësuar si roje plazhi tek hotel ‘ ‘Principotes’.
Konflikti që më pas i mori jetën të riut mendohet se ka ndodhur pikërisht tek shezlogjet ku dhe u gjet i pajetë.
Turisti francez është goditur disa herë me thikë. Gjatë ekspertizës mjeko ligjore në morgun e Sarandës mjeku ka konstatuar disa plagë të shkaktuara nga thika në shpinë dhe kraharor të cilat I kanë shkaktuar atij vdekjen e menjëhershme.
Do të jenë dëshmitë e miqve të Miguel Mendes por dhe marrja në pyetje e autorit, dëshmi të tjera dhe provat materiale që do të zbulojnë dinamikën dhe rrethanat e ngjarjes.
Marrë nga Syri.net
