Partia Demokratike Europiane (EDP) shpreh shqetësim në rritje për kufizimet që po prekin aktivistët dhe mediat e pavarura në Shqipëri.
Gjatë ditëve të fundit, raportohet se qindra llogari në Instagram të lidhura me aktivistë janë kufizuar ose çaktivizuar. Më pas është bllokuar llogaria në Instagram e Euronews Albania, ndërsa është pezulluar edhe faqja në Facebook e medias së pavarur Citizens.al.
Sekretari i Përgjithshëm i EDP-së, Sandro Gozi, deklaroi se:
“Prej ditësh, kryeministri Edi Rama ka gjetur kohë për të kritikuar Partinë Demokratike Europiane, për t’i cilësuar protestuesit ‘agjitatorë’ dhe madje për të komentuar edhe stilin vizual të postimeve tona në rrjetet sociale. Megjithatë, me sa dimë ne, ai nuk i ka kërkuar publikisht Meta-s të shpjegojë se përse janë kufizuar llogaritë e qindra aktivistëve shqiptarë — apo përse tani është bllokuar edhe llogaria në Instagram e Euronews Albania. Dhe tashmë është pezulluar edhe faqja në Facebook e Citizens.al, një media e pavarur shqiptare.”
Gozi e cilësoi situatën thellësisht shqetësuese dhe theksoi se kryeministri i një vendi demokratik që synon anëtarësimin në Bashkimin Europian duhet të jetë ndër të parët që mbron lirinë e shprehjes dhe lirinë e medias, veçanërisht kur preken zërat kritikë dhe të pavarur.
“Në vend që të vërë në pikëpyetje ata që ngrenë shqetësime legjitime, ai duhet t’u bashkohet atyre në kërkimin e transparencës dhe përgjigjeve”, tha Gozi.
Sekretari i Përgjithshëm i EDP-së kujtoi gjithashtu historinë e Shqipërisë nën diktaturë, censurë dhe represion, duke argumentuar se kufizimet që prekin gazetarët, aktivistët dhe qytetarët duhet të trajtohen me vigjilencë të veçantë.
Partia Demokratike Europiane i është drejtuar drejtpërdrejt Meta-s dhe e ka ngritur zyrtarisht këtë çështje edhe pranë Komisionit Europian.
“Gazetarët dhe shoqëria civile po kërkojnë përgjigje. Euronews Albania dhe Citizens.al po kërkojnë përgjigje. Prandaj është legjitime të pyesim përse kryeministri, i cili ka folur kaq gjerësisht për këtë debat, nuk u është bashkuar publikisht këtyre thirrjeve për sqarime”, tha Gozi.
Në përfundim, ai deklaroi:
“E ardhmja europiane e Shqipërisë meriton më shumë sesa përplasje politike mbi pyetje legjitime. Integrimi europian nuk ka të bëjë thjesht me hapjen e kapitujve të negociatave. Ai ka të bëjë me garantimin e demokracisë, pluralizmit, lirisë së shprehjes dhe lirisë së medias çdo ditë — veçanërisht atëherë kur mbrojtja e tyre mund të jetë politikisht e papërshtatshme.”
Marrë nga Citizens.al
