Kuvendi rikthehet këtë të martë në aktivitet pas pushimit veror. Deputetët do të mblidhen në orën 17:00 për hapjen e sesionit të ri parlamentar. Seanca e parë pritet të jetë kryesisht formale. Në nisje të punimeve pritet edhe procedura për ministren e re të Shëndetësisë, Klodiana Spahiu. Pas dekretimit nga Presidenti, ajo mund të bëjë betimin në Kuvend. Socialistët pritet të propozojnë gjithashtu një emër të ri për postin e nënkryetarit të Kuvendit, që më herët mbahej nga Spahiu.
Në sallë nuk pritet të jetë kreu i PD-së, Sali Berisha, i cili ndodhet në Shtetet e Bashkuara. Mbetet e paqartë nëse kryeministri Edi Rama do të marrë pjesë në seancë.
Rikthimi i deputetëve do të shoqërohet edhe me protestë jashtë Kuvendit. Qytetarët që protestojnë prej afro 100 ditësh kanë paralajmëruar tubim para godinës, ndërsa policia pritet të marrë masa të shtuara sigurie.
Sesioni i ri pritet të rikthejë në qendër edhe reformën territoriale. Socialistët kanë propozuar reduktimin e numrit të bashkive nga 61 në 46, një çështje që ka hapur debat me opozitën. Në sfond janë edhe zgjedhjet vendore të vitit 2027, të cilat pritet të zënë gjithnjë e më shumë vend në agjendën politike të mazhorancës dhe opozitës.
Marrë nga Lapsi.al
