Drejtori i Ujësjellësit të Elbasanit, Luan Tabaku, është dhunuar, në qendër të qytetit. Tabaku dyshohet se është sulmuar nga dy persona, Endri Çopja dhe Horgito Peqini. Përplasja ka ndodhur rreth orës 10:45, ndërsa dyshohet se gjatë sulmit janë përdorur edhe sende të forta.
Si pasojë e dhunës, Tabaku ka marrë dëmtime në kokë dhe sipas kartelës mjekësore, ka pësuar dy fraktura. Drejtori i Ujësjellësit nuk ka bërë kallëzim në polici, por për shkak se ngjarja ka ndodhur në një zonë publike dhe në prani të qytetarëve, Policia e Elbasanit ka nisur verifikimet kryesisht.
Hetuesit po punojnë për të zbardhur rrethanat e konfliktit dhe motivin e sulmit. Një nga pistat që po shqyrtohet lidhet me një çështje punësimi. Dyshohet se konflikti mund të ketë ardhur pas largimit nga puna në Bashkinë e Elbasanit të bashkëshortes së Endri Çopjës. Megjithatë, kjo mbetet vetëm një pistë hetimi dhe nuk është konfirmuar zyrtarisht si motiv i sulmit.
Marrë nga Dosja.al
