Sipas të dhënave katër të rinjtë rezultojnë të jenë larguar nga kujdesi i shërbimeve sociale pasi kishin mbërritur si minorenë të pashoqëruar në Britani.
Bledar Ismailaj, rezulton i zhdukur që prej vitit 2018. Në kohën kur është raportuar, ishte 17 vjeç dhe jetonte në zonën e King’s Lynn, Norfolk. Faqja zyrtare e “Missing People” e mban ende aktive thirrjen për informacion.
Ervis Ndreca ishte 17 vjeç në kohën e zhdukjes. Është larguar nga akomodimi i shërbimeve sociale në Hove, East Sussex, më datë 14 korrik 2022.
Akil Dervishi, gjithashtu 17 vjeç. Është shpallur i zhdukur në zonën e Sussex dhe është parë për herë të fundit më 4 maj 2022. Organizata “Missing People” ka një profil të dedikuar për të në platformën e saj.
Denis Haliaj, 17 vjeç. Pas mbërritjes në Angli ishte akomoduar në zonën Crumpsall, Manchester. Kontakti i fundit me të është regjistruar më 15 gusht 2021.
Këta emra janë pjesë e një liste më të gjerë të minorenëve shqiptarë të raportuar të humbur në periudhën janar-tetor 2021, çka tregon se fenomeni nuk është i izoluar.
Problematika ka marrë vëmendje kombëtare në Britani pas një investigimi të BBC-së në dhjetor 2022. Sipas raportit, deri në 20% e fëmijëve emigrantë shqiptarë të vendosur pranë një këshilli lokal në Angli gjatë vitit 2022 ishin klasifikuar si të zhdukur.
Mediat dhe organizatat britanike për mbrojtjen e fëmijëve, si ECPAT UK, e kanë cilësuar shifrën si “shumë shqetësuese”.
Raportet theksojnë se të rinjtë e larguar nga sistemi i mbrojtjes janë në rrezik ekstrem për t’u bërë viktimë e trafikimit njerëzor, skllavërisë moderne dhe shfrytëzimit kriminal. Format më të raportimit të shfrytëzimit janë si punë e detyruar në sektorin e ndërtimit ose në lavazhe makinash, shfrytëzim në shtëpi bari si “kopshtarë” apo përfshirhe në rrjetet e trafikut të drogës si shpërndarës.
Në janar 2023, ministri britanik i Emigracionit deklaroi se nga 4,660 fëmijë të pashoqëruar të mbërritur në Britani që nga korriku 2021, 440 ishin raportuar të zhdukur në një moment dhe 200 vazhdonin të ishin të zhdukur, me 88% të tyre me kombësi shqiptare.
Organizata “Missing People” bën thirrje që kushdo që ka informacion mbi vendndodhjen e tyre të kontaktojë linjën falas 116 000 ose policinë lokale britanike.
Marrë nga Newsbomb.al
