Ndërkohë që kryetari i Bashkisë Kolonjë, Erion Isai, është parë vazhdimisht muajt e fundit në korridoret e SPAK, ku është marrë i pandehur për dyshime mbi shkeljet në tendera dhe shpërdorim detyre, Kontrolli i Lartë i Shtetit ka nxjerrë në pah përmes një raporti të detajuar problematika të theksuara në administrimin e fondeve publike nga bashkia që ai drejton, duke nisur nga punimet e paguara, por të pakryera, deri te investimet për të cilat institucioni nuk disponon informacion të saktë nëse janë përfunduar apo jo.
Sipas raportit të KLSH-së, të konsultuar nga Skyweb.al, në Bashkinë Kolonjë rezultojnë shkelje të konstatuara në disa investime publike, ku vlera e punimeve të likuiduara, por të pazbatuara arrin në mbi 25 milionë lekë, ose rreth 250 milionë lekë të vjetra.
Bëhet fjalë për punime që janë përfshirë në dokumentacionin e pagesave të investimeve, por që gjatë kontrolleve të mëparshme të KLSH-së kanë rezultuar të parealizuara sipas detyrimeve kontraktore.
Në këto raste, problematika nuk lidhet thjesht me vonesat në përfundimin e një investimi, por me faktin se për punimet janë kryer pagesa, ndërkohë që audituesit kanë konstatuar se një pjesë e tyre nuk është realizuar.
Raporti evidenton katër investime publike, ku vlera e përgjithshme e këtyre punimeve arrin në 25,172,991 lekë me TVSH.
Rastin më të rëndë e përbën rikonstruksioni i digës së rezervuarit të Gjonçit dhe ndërtimi i pritave malore në fshatrat e Kolonjës, një kontratë e lidhur në dhjetor 2023.
Për këtë investim, KLSH ka konstatuar punime të paguara, por të pazbatuara, me vlerë 21,058,924 lekë, ose mbi 210 milionë lekë të vjetra.
Problematika janë evidentuar edhe në rehabilitimin e sheshit hyrës në Rehovë, i njohur si “Porta e Rehovës”, ku rezultojnë 1.8 milionë lekë punime të likuiduara, por të pazbatuara.
Një tjetër rast lidhet me rikualifikimin e rrugës “Pali Prifti” në qytetin e Ersekës, me rreth 1.9 milionë lekë punime të kësaj natyre, ndërsa në rikonstruksionin e kanalit vaditës të fshatit Gostivisht janë konstatuar 397 mijë lekë.
Ajo që e rëndon më tej situatën është fakti se shkeljet janë konstatuar në auditimet e mëparshme, ndërsa bashkia nuk ka zbatuar masat administrative të rekomanduara ndaj subjekteve që kanë mbikëqyrur këto investime.
“Nuk rezulton të jetë zbatuar asnjë nga 4 masat administrative të rekomanduara ndaj subjekteve mbikëqyrëse të punimeve, për shkelje të konstatuara në kontrata ku vlera e punimeve të likuiduara por të pazbatuara arrin në 25,172,991 lekë me TVSH”, thekson raporti i KLSH-së.
Pra, jo vetëm që gjatë kontrolleve janë konstatuar punime të paguara dhe të parealizuara, por edhe masat e kërkuara për ndjekjen e përgjegjësive kanë mbetur të pazbatuara.
Në raport evidentohen gjithashtu rekomandime të mëparshme për rikuperimin e dëmeve ekonomike, ku procedurat e arkëtimit ose të zhdëmtimit nuk kanë përfunduar për një vlerë prej 14.47 milionë lekësh pa TVSH.
Kjo shumë përfshin rekomandime nga auditime të mëparshme dhe nuk duhet t’i shtohet automatikisht vlerës prej 25.17 milionë lekësh, pasi bëhet fjalë për kategori të ndryshme konstatimesh financiare.
Problematikat shtrihen edhe në investimet e ujësjellësve, ku KLSH ka kërkuar rikuperimin e pagesave për punime të pakryera, si dhe verifikimin e pajisjeve të pavendosura dhe të sistemit elektronik të kontrollit SCADA.
Për këtë të fundit, audituesit kanë kërkuar funksionalizimin e sistemit ose, në të kundërt, arkëtimin e rreth 4.39 milionë lekëve.
Por problemet me investimet publike në Bashkinë Kolonjë nuk përfundojnë këtu.
KLSH ka konstatuar se administrata e bashkisë nuk disponon informacion të saktë mbi ecurinë dhe përfundimin e 17 projekteve të tjera të investimeve, me kosto historike prej 37,157,606 lekësh.
Këto projekte janë regjistruar në llogarinë kontabël “Studime dhe kërkime”, por sipas audituesve, bashkia nuk ka mbajtur regjistra të detajuar për secilin projekt, duke i grupuar investimet e viteve të ndryshme në një zë të vetëm.
Për pasojë, nuk ekziston informacion i saktë nëse investimet përkatëse janë kryer dhe nëse objektet kanë përfunduar, veçanërisht duke pasur parasysh se shumica u përkasin periudhave të mëparshme.
Konkretisht, raporti thekson se për 17 projektet “nuk ka informacion të saktë nëse këto investime janë kryer, objektet kanë përfunduar ose jo”.
Kjo nuk do të thotë domosdoshmërisht se investimet nuk janë realizuar, por se Bashkia Kolonjë nuk disponon evidenca të mjaftueshme në regjistrat përkatës për të dokumentuar saktë gjendjen dhe trajtimin e tyre financiar.
Për këtë arsye, KLSH i ka kërkuar Drejtorisë së Financës dhe Buxhetit të verifikojë përfundimin e 17 projekteve dhe të korrigjojë pasqyrimin e tyre në kontabilitet.
Problemet shtrihen edhe te inventarizimi i pasurive, ku audituesit kanë konstatuar mospërputhje milionëshe ndërmjet regjistrave të aktiveve dhe pasqyrave financiare për makineritë, pajisjet, mjetet e transportit dhe inventarin ekonomik.
Në përfundim të auditimit për vitin 2025, Kontrolli i Lartë i Shtetit ka evidentuar gjithsej 22 gjetje dhe ka dhënë 29 rekomandime për korrigjimin e problematikave.
Madje, për pasqyrat financiare të bashkisë është dhënë një opinion i kualifikuar, pasi audituesit kanë konstatuar gabime materiale në raportimin financiar.
Raporti tregon se problemet nuk lidhen vetëm me kryerjen e investimeve, por edhe me mënyrën se si bashkia i kontrollon, i dokumenton dhe ndjek përgjegjësitë për paratë publike të shpenzuara.
Ndërkohë, Erion Isai është marrë i pandehur nga SPAK për akuza që lidhen me shpërdorimin e detyrës dhe shkeljen e barazisë në tendera, në një procedim që përfshin edhe veprimtarinë e Bashkisë Kolonjë.
Marrë nga Skyweb.al
