Studenti i Mjekësisë, Jon Sinoimeri, ka reaguar ndaj kryeministrit Edi Rama, duke pretenduar se ky i fundit ka publikuar fotografinë e tij dhe e ka akuzuar për prodhim dhe shitje të lëndëve narkotike.
Në një deklaratë nga protesta studentore, Sinoimeri i ka kundërshtuar akuzat, duke theksuar se është student i Mjekësisë me rezultate të shkëlqyera dhe mesatare 10.0. Për të mbështetur deklaratën e tij, ai ka treguar edhe notat, ndërsa ka akuzuar kryeministrin se po përpiqet të diskreditojë të rinjtë që marrin pjesë në protestat kundër qeverisë.
Studenti kujtoi gjithashtu se Rama i ka etiketuar më herët protestuesit si “neokomunistë”, ndërsa i cilësoi deklaratat e kryeministrit si përpjekje për të njollosur imazhin e tyre publik.
Sinoimeri bëri të ditur se të martën e kaluar është shoqëruar në polici, ku, sipas tij, ka qëndruar për shtatë orë e gjysmë.
“Zoti kryeministër ka dalë sot dhe më ka akuzuar për prodhim dhe shitje narkotikësh. Shikojeni të gjithë. Jam student i Mjekësisë, e kam të shkruar dhe s’e di se çfarë legjendash me mbret shpik ky. Na ka akuzuar dhe na ka quajtur neokomunistë. Dua të tregoj dhe notat që kam marrë, 10.0”, u shpreh ai.
I pyetur nëse do të ndërmarrë hapa ligjorë ndaj kryeministrit, studenti shprehu skepticizëm për funksionimin e institucioneve, duke vënë në dyshim efektivitetin e një denoncimi.
“Kam qenë të martën e kaluar në polici. Kam qëndruar 7 orë e gjysmë. S’e di nëse do ta denoncoj. S’kam kohë për denoncime të kota, janë institucione të kota. Te kush do ta denoncoj?!”, deklaroi Sinoimeri.
Marrë nga Hashtag.al
