Në të gjithë botën, mënyra se si njerëzit lëvizin nëpër qytete ka ndryshuar tërësisht me futjen në lojë të platformave si Uber apo Bolt. Taksitë nuk priten më në cep të rrugës dhe as nuk porositen me telefonata të gjata, por thirren me një prekje në ekranin e celularit, ku çmimi, itinerari dhe koha e mbërritjes dihen që në sekondën e parë.
Tregu shqiptar i taksive ka qenë jashtë këtij inovacioni duke vazhduar të operojë sipas mënyrës klasike. Por kjo mund të ndryshojë shumë shpejt.
Kompania ndërkombëtare e teknologjisë Uklon ka nisur zyrtarisht fazën e testimit (beta) në Tiranë për shërbimin e saj të transportit urban, i njohur ndryshe si “ride-hailing” — një platformë digjitale përmes së cilës qytetarët mund të porosisin taksi ose makina me shofer direkt nga telefoni i tyre, ngjashëm me aplikacionet e njohura globale si Uber apo Bolt.
Uklon është pjesë e grupit Kyivstar Group Limited (KGL), i cili është i listuar në bursën amerikane Nasdaq. Hyrja në tregun shqiptar shënon një hap strategjik të zgjerimit të kompanisë në rajon, pas suksesit të saj në Ukrainë dhe Uzbekistan, dhe shoqërohet me një plan investimi prej rreth 15 milionë dollarësh në Shqipëri gjatë katër viteve të ardhshme.
Çfarë po ndodh në këtë fazë testimi?
Faza aktuale e testimit pritet të zgjasë disa javë dhe ka si qëllim kryesor që aplikacioni të përshtatet me realitetin e trafikut dhe rrugëve të Tiranës përpara hapjes së plotë komerciale.
Gjatë kësaj kohe, ekipi teknik po punon për:
• Verifikimin e saktësisë së hartave dhe llogaritjes automatike të itinerareve në kryeqytet.
• Testimin e algoritmeve që lidhin pasagjerët me shoferin më të afërt në kohë reale.
• Krijimin e bashkëpunimeve me kompanitë lokale të taksive dhe shoferët individualë, në mënyrë që shërbimi të jetë plotësisht funksional dhe i shpejtë.
Gjatë kësaj periudhe, zhvilluesit e Uklon do të mbledhin sugjerimet dhe përvojat e përdoruesve të parë dhe partnerëve lokalë për të përmirësuar çdo detaj të aplikacionit.
Drejtori Ekzekutiv i Uklon, Serhii Hryshkov, u shpreh se Shqipëria është një treg me potencial të lartë rritjeje dhe me kërkesë gjithnjë e më të madhe për shërbime digjitale. Sipas tij, synimi i kompanisë është t’i ofrojë Tiranës një zgjidhje moderne, transparente dhe të besueshme për lëvizjen në qytet, duke vendosur një standard të ri cilësie dhe duke krijuar qindra mundësi të reja vetëpunësimi për shoferët.
Kush është Uklon?
E themeluar mbi 16 vite më parë në Ukrainë, Uklon është sot një nga liderët e tregut në vendet ku operon. Vetëm në tremujorin e tretë të vitit 2026, platforma ka shërbyer për 5.4 milionë klientë dhe ka realizuar rreth 42.8 milionë udhëtime dhe 1.5 milionë dërgesa në Ukrainë dhe Uzbekistan.
Përveç transportit të pasagjerëve, ekosistemi i Uklon përfshin edhe shërbime të tjera brenda një aplikacioni të vetëm, si dërgesat e pakove (Uklon Delivery) dhe rezervimet e biletave të autobusëve (Uklon Travel).
Marrë nga Kapitali.al