Një ditë pasi dorëzoi mandatin e deputetit në Kuvend, Jurgis Çyrbja është marrë i pandehur nga Prokuroria e Posaçme. Ai akuzohet për kryerjen e veprës penale “Shpërdorim detyre”.
Hetimet për Çyrbjan nisën pas një kallëzimi të bërë nga deputeti i PD-së Edi Paloka për zgjedhjet e vitit 2021. Gjatë kohës kur ai drejtonte Hipotekën e Durrësit opozita e akuzonte se shpërndau leje legalizimesh me qëllime elektorale. Po ashtu asokohe, ai është marrë në pyetje nga Prokuroria e Krimeve të Rënda në atë kohë, pasi dyshohej se kishte favorizuar Emiljano Shullazin për të përfituar prona në Durrës.
Ditën e djeshme, socialisti tha për mediat se dorëheqja e tij nuk lidhet me thirrjen dhe paraqitjen në Prokurorinë e Posaçme. Ai është shprehur se nuk ka asnjë shqetësim të natyrës ligjore, por ka nevojë të kujdeset për shëndetin.
Tre ditë më parë, ish-deputeti u thirr në Prokurorinë e Posaçme, ku u mor në pyetje për 5 orë rresht.
