Agjencia shtetërore e lajmeve e Arabisë Saudite raportoi se princi i kurorës i vendit synon të investojë qindra miliarda në ekonominë amerikane gjatë mandatit të presidentit Donald Trump. Princi i kurorës i Arabisë Saudite deklaroi se mbretëria dëshiron të investojë 600 miliardë dollarë (576 miliardë euro) në SHBA gjatë katër viteve të ardhshme, pas një telefonate me presidentin amerikan Donald Trump.
Bëhet e ditur se komentet e Mohammed bin Salman vijnë pasi Trump mendoi për një vizitë në Arabinë Saudite si udhëtimin e tij të parë jashtë vendit në detyrë. Princi pohoi synimin e mbretërisë për të zgjeruar investimet dhe tregtinë me SHBA-në gjatë katër viteve të ardhshme, në shumën prej 600 miliardë dollarësh (576 miliardë euro) dhe potencialisht përtej kësaj. Por, nuk janë dhënë detaje se si do të shpenzohen saktësisht paratë.
Gjatë bisedës së dy liderëve, thuhet se ata diskutuan mënyrat se si vendet mund të bashkëpunojnë për të vendosur paqen, sigurinë dhe stabilitetin në Lindjen e Mesme. Raportohet se pas inaugurimit të tij, Trump foli për mundësinë që të shkonte sërish në mbretëri, në udhëtimin e tij të parë jashtë vendit, siç bëri në vitin 2017.
“Udhëtimi i parë jashtë vendit zakonisht ka qenë në Britaninë e Madhe, por herën e fundit e bëra në Arabinë Saudite, sepse ata ranë dakord të blinin 450 miliardë dollarë (429 miliardë euro) të produkteve tona”, u tha Trump gazetarëve në Zyrën Ovale.
Marrë nga Daily Mail
