Dy shkencëtarë kinezë janë arrestuar për kontrabandë në Shtetet e Bashkuara të një kërpudhe toksike që mund të përdoret si “armë agroterrorizmi”. Yunqing Jian, një shkencëtare 33-vjeçare në Universitetin e Miçiganit, dhe i dashuri i saj, 34-vjeçari Zunyong Liu akuzohen për komplot, kontrabandë mallrash, deklarata të rreme dhe mashtrim me viza.
Kërpudha që ata po tentonin të fusnin në SHBA mund të infektojë të korra si gruri, elbi dhe orizi. Nëse konsumohet shkakton të vjella, dëmtim të mëlçisë dhe defekte riprodhuese tek njerëzit dhe bagëtitë. FBI tha se Fusarium graminearum klasifikohet në literaturën shkencore si një “armë e mundshme agroterrorizmi”.
“Është përgjegjës për miliarda dollarë humbje ekonomike në të gjithë botën çdo vit”, shtoi deklarata e zyrës së prokurorit të SHBA-së.
Hetimi zbuloi gjithashtu se Jian kishte marrë fonde nga qeveria kineze për punë të ngjashme mbi këtë patogjen në Kinë, sipas një postimi në X nga drejtori i FBI-së, Kash Patel. Liu punonte në një universitet kinez ku kreu kërkime mbi patogjenin toksik, pretenduan autoritetet.
Ai ishte përpjekur të kontrabandonte kërpudhat përmes aeroportit të Detroitit në korrik 2024 me qëllim që të vazhdonte kërkimet e tij së bashku me Jian në Universitetin e Miçiganit. Megjithatë, autoritetet gjetën materialin e kuq bimor në çantën e tij dhe e dërguan atë përsëri në Kinë. Duke pasur parasysh se SHBA-ja dhe Kina nuk kanë një traktat ekstradimi, nuk ka gjasa që Liu të përballet me akuza, përveç nëse zgjedh të kthehet në SHBA.
Jian u paraqit në gjykatë dhe u kthye në burg ndërsa pret seancën e saj dëgjimore për lirimin me kusht të enjten. Gazetarët nuk u lejuan të hynin në sallën e gjyqit, por raportet thanë se ajo ishte e prangosur dhe e lidhur në bel dhe dukej dukshëm e frikësuar ndërsa lexoheshin akuzat.
Marrë nga Fox News
