Pasuria neto e CEO-së së Tesla-s, Elon Musk, ra me 34 miliardë dollarë të enjten, si rezultat i një përplasjeje publike me presidentin Donald Trump. Sipas të dhënave nga Bloomberg Billionaires Index, kjo ishte rënia e dytë më e madhe e regjistruar ndonjëherë, në këtë indeks.
Vlera e pasurisë së Musk zbriti në 334.5 miliardë dollarë, duke reflektuar një rënie të ndjeshme në çmimin e aksioneve të Tesla-s, të cilat humbën rreth 14% gjatë së njëjtës ditë. Rënia erdhi në mes të debatit publik midis Musk dhe Trump lidhur me një projektligj të ri të propozuar nga republikanët, për të cilin Musk ka shprehur kundërshtim të hapur.
Trump, nga ana e tij, kritikoi qëndrimin e Musk dhe sugjeroi se qëndrimi i tij mund të ndikojë në marrëdhëniet e Tesla-s dhe SpaceX me qeverinë federale, përfshirë subvencionet dhe kontratat publike.
Bloomberg vëren se rënia në pasurinë e Musk nuk përfshin ndikimet e mundshme në kompanitë që nuk janë publike, si SpaceX.
Pavarësisht kësaj rënie të konsiderueshme, Musk mbetet personi më i pasur në botë. Sipas të njëjtit indeks, ai është mbi 90 miliardë dollarë përpara CEO-së së Meta-s, Mark Zuckerberg (241 miliardë dollarë), dhe rreth 105 miliardë përpara themeluesit të Amazon-it, Jeff Bezos (229 miliardë dollarë).
Pasuria e Musk ka qenë e paqëndrueshme vitet e fundit, por qëndron në nivele historikisht të larta, pasi në dhjetor 2024 kishte arritur deri në 439.2 miliardë dollarë.
Marrë nga Bloomberg.com
