Policia në Boulder, Colorado, është duke hetuar pas raportimeve se një burrë i vuri njerëzit në zjarr gjatë një sulmi, duke lënë disa persona të plagosur, thanë autoritetet në një konferencë për shtyp. Një i dyshuar është në paraburgim.
“Kur arritëm, hasëm disa viktima me lëndime,” tha të dielën shefi i policisë së Boulder-it, Stephen Redfearn.
Një grup demonstruesish pro-Izraelitë po merrnin pjesë në një demonstratë paqësore, shtoi Redfearn.
“Ne jemi të vetëdijshëm dhe po hetojmë plotësisht një sulm terrorist të synuar në Boulder, Colorado. Agjentët tanë dhe forcat lokale të rendit ndodhen tashmë në vendngjarje, dhe do të ndajmë përditësime sapo të kemi më shumë informacion,” tha drejtori i FBI-së, Kash Patel, në një postim në rrjetet sociale të dielën.
Personeli i FBI-së ndodhet në vendngjarje së bashku me forcat vendore të rendit, sipas zëvendësdrejtorit të FBI-së, Dan Bongino.
“Ne po e hetojmë këtë incident si një akt terrori dhe dhune të synuar,” shkroi Bongino në rrjetet sociale. “Të gjitha burimet e nevojshme do t’i përkushtohen këtij hetimi.”
Sulmi i raportuar ndodhi gjatë aktivitetit “Run for Their Lives” në Boulder, tha Liga Kundër Shpifjeve (Anti-Defamation League) në rrjetet sociale. Ky takim javor i anëtarëve të komunitetit hebre ka për qëllim të mbështesë pengjet e marra gjatë sulmeve të 7 tetorit në Izrael në vitin 2023.
Incidenti ndodhi përpara festës së Shavuot-it, sipas ADL – një festë hebraike që kremton dhënien e Torës popullit hebre në malin Sinai.
Marrë nga Associated Press
