Drejtori i shërbimit inteligjent gjerman (BND), Bruno Kahl, ka deklaruar se Rusia dëshiron të testojë vendosmërinë e NATO-s përmes operacioneve jashtë Ukrainës, pasi disa zyrtarë rusë besojnë se parimi i mbrojtjes kolektive të Aleancës nuk funksionon më, shkruan Bild.
Ky vlerësim i shefit të BND-së vjen pas paralajmërimit të sekretarit të Përgjithshëm të NATO-s, Mark Rutte, për sulm të mundshëm të Rusisë ndaj vendeve të aleancës brenda pesë vjetëve të ardhshme.
Kahl theksoi se Moska e sheh luftën në Ukrainë si “vetëm një hap drejt Perëndimit”.
Duke cituar burime të inteligjencës, ai ka thënë se Rusia mund të përpiqet të nisë konflikt me intensitet më të ulët për të testuar gatishmërinë e Shteteve të Bashkuara për të përmbushur detyrimet e saj sipas Nenit 5 të traktatit të NATO-s.
“Në Moskë ka njerëz që nuk besojnë më se Neni 5 i NATO-s funksionon. Dhe ata do të donin ta testonin atë. Nuk kanë nevojë të dërgojnë tanke për këtë. Mjafton të dërgojnë ‘njerëz të vegjël të gjelbër’ në Estoni për të ‘mbrojtur’ pakicën ruse të shtypur, siç pretendojnë ata”, ka thënë Kahl.
Termi “njerëz të vegjël të gjelbër” u përdor për herë të parë për ushtarët rusë pa shenja dalluese që pushtuan objektet kyçe strategjike në Krime në vitin 2014, gjatë fazës fillestare të pushtimit të gadishullit ukrainas nga Rusia.
Shqetësimet mes vendeve anëtare të NATO-s për një agresion të mundshëm rus dhe përkushtimin e Uashingtonit ndaj aleancës janë rritur që nga ardhja në pushtet e presidentit amerikan Donald Trump në janar.
Marrë nga BILD.de
