Qeveria e Venezuelës ka thënë se lideri i opozitës Edmundo Gonzalez ka ikur nga vendi, dhe ka kërkuar azil në Spanjë, raporton “BBC”.
Zëvendëspresidentja e Venezuelës, Delcy Rodriguez, në një postim në rrjete sociale tha se Gonzalez kishte shkuar në Ambasadën e Spanjës disa ditë më parë dhe kishte kërkuar nga Qeveria e Spanjës azil politik.
Ajo ka shtuar se Venezuela është pajtuar t’i ofrojë atij largim të sigurt dhe ai është larguar. Ministri i Jashtëm i Spanjës, Jose Manuel Albares, ka thënë se Gonzalez është larguar nga Venezuela me kërkesën e vetë, me një aeroplan të Forcës Ajrore të Spanjës.
Ai ka thënë se Qeveria e Spanjës është e përkushtuar për të drejtat politike të të gjithë venezuelanëve.
Një avokat i Gonzalezit ka konfirmuar për agjencinë “AFP” se ai është larguar nga Venezuela për në Spanjë, por nuk ka dhënë më tepër detaje.
Derisa ai u largua, forcat e sigurisë së Venezuelës kanë rrethuar Ambasadën e Argjentinës në Karakas.
Gjashtë kundërshtarë politikë të Maduros janë duke u strehuar atje. Ministria e Jashtme e Venezuelës ka pretenduar se “po komplotohet për vepra terroriste brenda”.
Venezuela është zhytur në një krizë politike që kur autoritetet e shpallën Maduron fitues të zgjedhjeve të 28 korrikut.
Opozita ka pretenduar se ka dëshmi se Gonzalez i ka fituar bindshëm zgjedhjet.
Një numër i shteteve, përfshirë SHBA-në, Bashkimin Evropian dhe shtete të Amerikës Latine, kanë refuzuar ta njohin Maduron si fitues të zgjedhjeve presidenciale pa u publikuar të dhënat e plota të votimit.
Qeveria e Maduros ka arrestuar mbi 2400 persona që nga zgjedhjet, duke krijuar “një klimë të frikës” siç e kanë quajtur Kombet e bashkuara.
Zyra e Prokurorit të Përgjithshëm e kishte akuzuar Gonzalezin për konspiracion dhe falsifikim të dokumenteve.
75-vjeçari nuk ishte i njohur para marsit të këtij viti, kur koalicioni opozitar e bëri atë kandidat presidencial.
