Numri i ushtarëve rusë dhe ukrainas të vrarë, të plagosur ose të zhdukur gjatë gati katër viteve të luftës në Ukrainë mund të arrijë në rreth dy milionë deri në pranverë, sipas një studimi të ri të publikuar nga Qendra për Studime Strategjike dhe Ndërkombëtare (CSIS) në Uashington.
Përcaktimi i shifrave të sakta ka qenë i vështirë gjatë gjithë konfliktit, pasi Rusia dyshohet se nënvlerëson humbjet e saj, ndërsa Ukraina nuk publikon statistika zyrtare. Studiuesit janë mbështetur në vlerësime të qeverive amerikane dhe britanike, si dhe burime të tjera të pavarura.
Megjithëse dimri ka ngadalësuar operacionet ushtarake për të dyja palët, Rusia ka shënuar përparime në rajonet lindore të Luhanskut dhe Donetskut, ku përpjekjet për kontroll të plotë vazhdojnë.
Taktikat e luftës kanë ndryshuar ndjeshëm. Për shkak të pranisë së vazhdueshme të dronëve, Rusia po përdor gjithnjë e më shumë grupe të vogla ushtarësh në këmbë ose me motoçikleta, në vend të mjeteve të rënda të blinduara. Nga ana tjetër, operatorët ukrainas të dronëve monitorojnë gjurmët në dëborë për të zbuluar lëvizjet ruse.
Raporti u publikua pak ditë pasi përfunduan bisedimet e para trepalëshe mes zyrtarëve rusë, ukrainas dhe amerikanë, të cilat u përshkruan si relativisht pozitive. Presidenti ukrainas Volodymyr Zelensky deklaroi se negociatat kanë shënuar përparim, ndërsa Kremlini njoftoi se bisedimet do të rifillojnë javën e ardhshme.
Sipas studimit, rreth 325,000 ushtarë rusë janë vrarë që nga fillimi i pushtimit në shkurt 2022, ndërsa 100,000 deri në 140,000 trupa ukrainase vlerësohet se kanë humbur jetën. Vetëm gjatë vitit 2025, Rusia ka pësuar rreth 415,000 viktima, me një mesatare prej 35,000 në muaj.
Autorët e raportit theksojnë gjithashtu ndikimin e rëndë të luftës në ekonominë ruse, e cila po përballet me rritje të ngadaltë, rënie të prodhimit dhe mungesë inovacioni teknologjik.
“Performanca e dobët ushtarake dhe rënia e produktivitetit ekonomik tregojnë se Rusia është në një rënie serioze si fuqi e madhe,” thuhet në studim.
Marrë nga The Guardian
