Gjykata Speciale ka miratuar tërheqjen e avokatit Ben Emmerson nga roli i tij si mbrojtës i ish-kryeparlamentarit Kadri Veseli. Ndërkaq ka siguruar se ky ndryshim nuk do të sjellë vonesa në procesin gjyqësor.
Në njoftimin zyrtar të lëshuar nga Gjykata më 21 gusht 2024, u theksua se Trupi Gjykues në çështjen Thaçi dhe të tjerët ka miratuar përfundimin e përfaqësimit ligjor të Veselit nga Emmerson. Ky vendim u mor pasi të dy, Veseli dhe Emmerson, arritën një marrëveshje të përbashkët për tërheqjen.
Gjykata u shpreh e bindur se ndryshimi në ekipin mbrojtës nuk do të shkaktojë ndonjë vonesë në procesin gjyqësor. Gjykata gjithashtu bëri të ditur se vendimi për largimin e Emmersonit do të hyjë në fuqi menjëherë pas emërimit të një kryembrojtësi të ri.
