Kuvendi i Kosovës ka miratuar vendimin e Qeverisë për shpalljen e masave emergjente në furnizimin me energji elektrike. Vendimi u votua pas mesnatës dhe do të jetë në fuqi për një periudhë 60-ditore. Nisma mori 61 vota pro nga deputetët, ndërsa u përfshi në rendin e ditës përmes një mocioni gjatë seancës parlamentare, e cila vijoi deri në orët e para të mëngjesit të së premtes.
Në kuadër të masave të reja, ndërmarrja ‘Ibër-Lepenci’ do të ketë detyrimin të prodhojë energji elektrike nga hidrocentrali i Ujmanit, me qëllim furnizimin e konsumatorëve që përfitojnë nga shërbimi universal. Njëkohësisht, parashikohet ngritja e një Komiteti Teknik Emergjent, i cili do të angazhohet për menaxhimin dhe adresimin e problematikave në sektorin energjetik.
Vendimi është shoqëruar me debate dhe kundërshtime nga radhët e opozitës, ku deputeti i Partisë Demokratike të Kosovës, Eman Rrahmani, kërkoi largimin nga detyra të ministres së Ekonomisë, Artane Rizvanolli, duke e konsideruar atë përgjegjëse për situatën energjetike në vend. Edhe deputetja e Lidhjes Demokratike të Kosovës, Janina Ymeri, shprehu rezerva ndaj politikave të Qeverisë në këtë sektor, duke kritikuar mënyrën e organizimit dhe funksionimit të tregut të energjisë.
Gjatë së njëjtës seancë, Kuvendi dha gjithashtu miratimin në parim për Projektligjin për Rregullatorin e Energjisë, me 61 vota pro. Votimi u zhvillua rreth orës 00:45, ndërsa gjatë diskutimeve për këtë projektligj, Ymeri ngriti shqetësime për ndikimin e tregtarëve të energjisë mbi institucionin rregullator, duke pretenduar se ndryshimet e propozuara synojnë kryesisht përmbushjen e kërkesave të paketës evropiane.
Me 61 vota pro, deputetët miratuan në lexim të parë edhe Projektligjin për Efiçencën e Energjisë, ndërsa rreth orës 01:15 përfundoi procesi i votimit. Ndërkohë, pas orës 02:00, Kuvendi kaloi në lexim të parë edhe Projektligjin për Inspektoratin Qendror të Trashëgimisë Kulturore. Ky projektligj mori 62 vota pro, 8 kundër dhe një abstenim, ndërsa kundër tij u shprehën deputetët e Listës Serbe.
Marrë nga Dosja.al