Informacione të reja të siguruara nga agjencitë e inteligjencës amerikane tregojnë se Izraeli po përgatitet të ndërmarrë sulme ndaj objekteve bërthamore iraniane, raportoi të martën rrjeti televiziv CNN, duke cituar burime nga administrata e ish-presidentit Donald Trump, të njohura me këtë çështje.
Agjencia e lajmeve Reuters thekson se nuk është në gjendje të verifikojë këto informacione në mënyrë të pavarur për momentin. Këshilli i Sigurisë Kombëtare në Shtëpinë e Bardhë nuk iu përgjigj menjëherë kërkesave për koment. E njëjta gjë vlen edhe për ambasadën izraelite në Uashington dhe zyrën e kryeministrit të Izraelit, Benjamin Netanyahu.
Administrata Trump ka zhvilluar së fundmi negociata me Iranin me synimin për të arritur një marrëveshje të re mbi programin bërthamor të Republikës Islamike.
Sipas CNN, vlerësimi i inteligjencës amerikane është mbështetur në deklaratat publike dhe private të zyrtarëve të lartë izraelitë, komunikime të përgjuara, si dhe vëzhgime të lëvizjeve të forcave të armatosura të Izraelit.
Dy burime konfirmuan për CNN se ndër përgatitjet e vëzhguara nga SHBA-të përfshihen lëvizja e municioneve si dhe përfundimi i një sërë ushtrimesh ajrore izraelite, të cilat janë vlerësuar si sinjale përgatitore për një operacion të mundshëm ushtarak.
Ndërkohë, më herët gjatë ditës së djeshme, udhëheqësi suprem i Iranit, Ajatollah Ali Khamenei, deklaroi se kërkesa e SHBA-së që Irani të ndalojë plotësisht pasurimin e uraniumit është “e tepruar dhe skandaloze”, sipas mediave shtetërore iraniane. Khamenei shprehu skepticizëm për negociatat aktuale, duke vënë në dyshim nëse ato do të çojnë në ndonjë rezultat konkret.
Marrë nga CNN
