Nga Peter Pinedo
Një nga grupet që po organizon protesta kundër kapjes së diktatorit socialist venezuelian, Nicolás Maduro, nga presidenti Donald Trump, është një organizatë e financuar nga Open Society Foundations (Fondacionet për Shoqërinë e Hapur), e lidhur me George Soros.
Pushtimi i kryeqytetit të Venezuelës, Karakasit, nga Trump dhe arrestimi i mëpasshëm i Maduro-s dhe bashkëshortes së tij, Cilia Flores, të shtunën, shkaktoi reagime të menjëhershme nga disa grupe, përfshirë disa që e quajnë veten Koalicioni “No War on Venezuela”.
Në një fletë-thirrje të publikuar nga Alliance for Global Justice (AFGJ) — organizatë e financuar nga Soros — koalicioni bëri thirrje për protesta globale para ambasadave amerikane, bazave ushtarake, bashkive dhe objekteve të tjera, për të “mbrojtur sovranitetin e Venezuelës dhe të drejtën për të rezistuar”.
Në fletë-thirrje thuhej: “Ne, organizatat anti-imperialiste dhe anti-luftë, dënojmë sulmet e dhunshme të SHBA-së ndaj të drejtave të venezuelianëve dhe shkeljen e sovranitetit të Venezuelës.”
Koalicioni u bëri thirrje qytetarëve për “rezistencë masive” kundër veprimeve të administratës Trump, duke i nxitur të: dalin në rrugë, organizojnë tubime dhe leksione ndërgjegjësuese në universitete, mobilizohen në sindikata për të treguar solidaritet, bllokojnë zinxhirët e furnizimit të “imperializmit”, përfshirë protesta dhe piketime para fabrikave të armëve dhe porteve që furnizojnë armët për këtë agresion.
Në veçanti, koalicioni u bëri thirrje personave jashtë SHBA-së të synojnë: ambasadat amerikane, bazat ushtarake amerikane dhe instalacionet diplomatike në mbarë botën.
Sipas faqes zyrtare të Open Society Foundations, rrjet filantropik i themeluar nga George Soros dhe i drejtuar nga djali i tij Alex Soros, organizata ka dhuruar 250.000 dollarë për AFGJ në vitin 2020.
Qëllimi i deklaruar i donacionit ishte: “të katalizojë komunitetet afro-amerikane në lëvizjen globale për drejtësi klimatike”.
Në një deklaratë për Fox News Digital, një zëdhënës i Open Society Foundations sqaroi se financimi ishte vetëm për punë mbi drejtësinë klimatike në vitin 2020 dhe se që prej asaj kohe OSF nuk e ka financuar më AFGJ-në.
AFGJ është një kritik i fortë i administratës Trump. Në një deklaratë të martën, organizata shkroi: “Lufta kundër Venezuelës është luftë kundër nesh të gjithëve”.
AFGJ e lidhi ndërhyrjen në Venezuelë me vendosjen e Gardës Kombëtare në qytete të mëdha amerikane, duke i përshkruar si: “okupim të rrugëve tona si pjesë e një shtypjeje hemisferike të rezistencës.”
Sipas organizatës: “Njerëzit me ngjyrë, emigrantët dhe të gjithë ata që rezistojnë, shpallen armiq të brendshëm, ndërsa lëvizjet e solidaritetit ndërkombëtar janë objektiva të luftës hibride.”
Deklarata përfundon: “Strategjitë e luftës dhe shtypjes kundër Venezuelës janë pjesë e një strategjie të vetme — jo vetëm kundër vendeve të tjera, por edhe këtu në shtëpi. Memphis apo Karakas — për Pentagonin, ne jemi të gjithë njësoj.”
Pas muajsh dislokimi të forcave ushtarake amerikane në Karaibe, Trump autorizoi një sulm ushtarak në Karakas, që çoi në kapjen e Maduro-s dhe bashkëshortes së tij, të cilët u transportuan në New York për t’u përballur me drejtësinë.
Maduro dhe Cilia Flores janë akuzuar në gjykatë federale amerikane për: komplot për trafikimin e sasive të mëdha të kokainës në SHBA, narco-terrorizëm dhe vepra penale që lidhen me armë.
Të dy kanë deklaruar pafajësi.
Shtëpia e Bardhë, AFGJ dhe Open Society Foundations nuk dhanë koment të menjëhershëm për Fox News Digital.
Marrë nga Fox News
