Një thatësirë e madhe e ka bërë ujin e rubinetit të papijshëm në disa qytete përgjatë Costa Blanca të Spanjës, duke i detyruar pushuesit dhe vendasit të qëndrojnë në radhë në pikat e shpërndarjes, për të marrë shishe me ujë për të plotësuar nevojat e tyre bazë.
Ndërsa nivelet e ujit kanë rënë, nivelet e kripës në ujë janë rritur, duke bërë që autoritetet në disa zona ta konsiderojnë ujin e rubinetit të pasigurt për të pirë ose gatuar. Shishet e ujit shpërndahen falas.
Zhvillimi, ndryshimet klimatike dhe turizmi masiv gjatë muajve të verës, kur popullsia e destinacionit popullor mesdhetar rritet, e kanë përkeqësuar problemin, thonë aktivistët.
Në zonën e Marina Alta, në veri të kryeqytetit të provincës Alicante, konsumi i ujit rritet në 19.67 miliardë litra në korrik nga 2.3 miliardë litra në janar.
Ka rreth 38,000 pishina në zonë, ose një për çdo pesë banorë, sipas Institutit Kombëtar të Statistikave. Mesatarja për të gjithë Spanjën është një pishinë për 35 persona.
Mungesa e ujit ka detyruar këshillin e qytetit të ndalojë aktivitete të tilla si mbushja e pishinave, apo ujitja e kopshteve dhe larja e makinave gjatë ditës.
Tradicionalisht, valencianët ia atribuojnë aromën e veçantë paella-s lokale, ujit të fortë të pasur me minerale.
Thatësira kishte shkaktuar gjithashtu mbi 65 milionë euro humbje në sektorin e bujqësisë së rajonit, tha në korrik shoqata e fermerëve ASAJA.
