As ujësjellësit nuk i shpëtojnë “kthetrave” të kompanisë Gjikuria. Në Gjirokastër, një tjetër tender publik ka përfunduar në duart e një bashkimi operatorësh të drejtuar nga Gjikuria sh.p.k., pavarësisht se katër kompani kishin ofruar çmime më të ulëta – dhe në një rast, me rreth 600 milionë lekë të vjetra më pak me TVSH!
Objekti i tenderit është ndërtimi i ujësjellësve në fshatrat Fushëbardhë dhe Zhulat, në Bashkinë Gjirokastër. Procedura u zhvillua nga Shoqëria Rajonale Ujësjellës-Kanalizime Gjirokastër SH.A, me një fond limit prej 248 milionë lekësh të reja pa TVSH, ose afërsisht 3 miliardë lekë të vjetra me TVSH.
Fituesi? Bashkimi i operatorëve “Gjikuria” në pronësi të Florenc dhe Milo Gjikuria dhe “EC Pro Partners” në pronësi të Emiliano Delilaj dhe Migel Ali.
Ironia është se nga 6 kompani pjesëmarrëse, katër kishin oferta më të ulëta, por çuditërisht “gara” u fitua nga një ofertë që thuajse “prek” tavanin e fondit. Diferenca mes ofertës fituese dhe më të lirat? Plot 600 milionë lekë të vjetra me TVSH, një shumë që mund të ndërtonte një tjetër ujësjellës.
Ky tender i dyshimtë me numër reference REF-34685-12-26-2024 është vetëm një në listën e gjatë ku Gjikuria del “fitues” përkundër konkurrencës më të lirë. Një model që shton dyshimet se jo gjithmonë çmimi më i ulët fiton, por shpesh ai më “i preferuari”.
Marrë nga JOQ
