Kryetari i të ashtuquajturit Asociacion i Qytetarëve të Qarkut të Mitrovicës, Rasha Rojeviq, ka paralajmëruar se nga 6 shtatori serbët do të organizojnë bllokada në të gjitha pikat kufitare me Kosovën.
Rojeviqi tha për agjencinë serbe të lajmeve “Beta” se bllokada do të zgjasë derisa Policia e Kosovës të tërhiqet nga veriu i vendit.
“Bllokada do të fillojë të premten dhe do të zgjasë derisa forcat policore të Kosovës të tërhiqen nga veriu i Kosovës dhe t’u kthehen serbëve institucionet e uzurpuara. Ne gjithashtu kërkojmë që KFOR-i, në përputhje me mandatin e Rezolutës 1244, të marrë kontrollin e veriut të Kosovës”, tha Rojeviqi, shkruan Kossev.
Sipas tij, bllokadat do të zgjasin deri në plotësimin e të gjitha kërkesave të qytetarëve, teksa paralajmëroi se në këto bllokada nuk do të marrin pjesë serbët nga Kosova.
“Nuk presim ndihmë nga shteti dhe as nuk kemi nevojë për të. Serbët që jetojnë në Kosovë nuk do të marrin pjesë në bllokada që të mos ngacmohen nga Policia e Kosovës, por vetëm qytetarët nga territori i Serbisë, Mali i Zi dhe Republika Sërpska”, tha Rojeviqi.
Siç është paralajmëruar, do të bllokohen pikat kufitare në Bërnjak, Jarinjë, Merdar, Dheu i Bardhë dhe Kullë.
