Në një përpjekje për të siguruar një normë më të ulët tarifore, Malajzia është zotuar të nënshkruajë marrëveshje tregtare me SHBA-në, me marrëveshje me vlerë kumulative mbi 240 miliardë dollarë amerikanë për blerjen e artikujve të tillë si avionë Boeing, qymyr dhe pajisje telekomunikacioni.
Ministri i Investimeve, Tregtisë dhe Industrisë, Tengku Datuk Seri Zafrul Abdul Aziz i tha Parlamentit të hënën, në një deklaratë të posaçme ministrore, se konsideratat tregtare ndihmuan në sigurimin e një tarife më të ulët amerikane prej 19%, nga 25%.
Zafrul theksoi se blerja e avionëve Boeing nuk ishte “një vendim i papritur i marrë nën presionin e tarifave”, por pjesë e planit afatgjatë të MAG për të zëvendësuar avionët e vjetër B737-800 dhe për të përmbushur kërkesën në rritje të udhëtimit.
Në qershor dhe korrik, Petronas nënshkroi dy marrëveshje 20-vjeçare për të blerë nga një milion ton në vit LNG (Gazi natyror i lëngshëm) secila nga Venture Global Inc dhe Commonëealth LNG, duke arritur në total dy milion ton në vit nga Luiziana.
Tarifa e Malajzisë tani përputhet me normat e vendosura ndaj Tajlandës, Indonezisë, Kamboxhias dhe Filipineve. Norma është më e ulët se 20 përqind e Vietnamit dhe 25 përqind e Bruneit, por më e lartë se 10 përqind e Singaporit. Laosi dhe Mianmari përballen me normën më të lartë midis shteteve anëtare të ASEAN-it, me 40 përqind.
“Shtetet e Bashkuara e inkurajojnë Malajzinë të sigurojë dhe të investojë në Amerikë sipas Seksionit 6 të marrëveshjes, për të adresuar çekuilibrin tregtar dypalësh”, ka thënë ministri Tengku Zafrul.
Në vitin 2024, SHBA-të ishin destinacioni më i madh i eksportit të Malajzisë, me dërgesa me vlerë gati 198.7 miliardë RM (60.4 miliardë dollarë singaporianë) dhe ndër burimet e saj kryesore të investimeve të huaja direkte, me një total prej 32.8 miliardë RM.
Tengku Zafrul vuri në dukje se ndryshimet në politikën tregtare të SHBA-së paraqesin rreziqe reale: Deri në 100,000 vende pune, kryesisht në Penang dhe Kedah, mund të humbasin nëse eksportet elektrike dhe elektronike në SHBA ndërpriten si rezultat i tarifave.
Marrë nga Reuters
