Eksportet shqiptare këtë vit janë përfshirë në një rritje imagjinare në letra, për shkak të përfshirjes në llogaritje të mallrave që kalojnë nga Shqipëria tranzit drejt Kosovës.
Rritja e eksporteve është ndikuar nga Kosova, shitjet drejt të cilës u rritën me 75.5% në tetë-mujor, dhe gati dyfish për gushtin (+94.6%) e ndikuar kryesisht nga grupi “mineralet, lëndët djegëse e energjia”.
Nga 9,9 miliardë që janë rritur eksportet në total në vlerë, shitjet e Kosovës janë zgjeruar me 20.1 miliardë lekë, për 8 mujorin, duke amortizuar rënien e eksporteve drejt shteteve të tjera, kryesisht drejt Italisë dhe Maqedonisë së Veriut.
Eksportet drejt Kosovës zunë 17.8% të totalit në 8 mujorin 2025, nga rreth 10% të njëjtën periudhë të një viti më parë, duke u renditur e dyta pas Italisë (38.8%).
Por, rritja e fortë e eksporteve me Kosovën ka të bëjë me faktin se që nga 1 janari 2025 tranzitet e karburantit drejt Kosovës raportohen edhe si ri-eksporte, duke ndikuar në zgjerimin e fortë të eksporteve në vlerë. Eksportet reale drejt Kosovës kanë një tendencë rritje normale prej 510%, sipas infove nga Dogana.
Duke hequr efektin e ndryshimit të metodologjisë, që nuk janë eksportet reale drejt Kosovës, por tranzit i produkteve përmes Shqipërisë, tendenca reale e eksporteve në total, vijon me rënie, me rreth 8- 9 miliardë lekë ose minimumi -3%.
Monitor mësoi se doganat dhe INSTAT janë duke punuar për saktësimin e kodeve dhe ecuria e saktë e eksporteve do të mësohet në vijim.
Lëndët djegëse, energjia e mineralet, rritja nga Kosova“Minerale, lëndë djegëse e energji” është grupi me rritjen më të madhe në 8- muajt e parë e këtij viti. Për janar-gusht, eksportet arritën në gati 75 miliardë lekë, me një rritje prej 51% në krahasim me të njëjtën periudhë të një viti më parë.
Ndryshe nga vitet e mëparshme, kur efektin kryesor e kishin shitjet e Bankers Petroleum në Spanjë, ose energjia, ndikimin kryesor në këtë tendencë e ka dhënë Kosova, që ka pasur një zgjerim të fortë të shitjeve të grupmallit “Lëndët djegëse minerale, vajrat minerale dhe produktet e distilimit të tyre”, që siç u shpjegua më lart ka të bëjë me riklasifikimin e eksporteve drejt shtetit fqinj.
Marrë nga Monitor
