Në një kohë kur çmimet e produkteve bazë vijojnë të rëndojnë xhepin e qytetarëve, luksi vijon të ndjekë një tjetër ritëm.
Shqiptarët po shpenzojnë gjithnjë e më shumë për ora dore, veçanërisht për modele të markave të njohura ndërkombëtare, që shpesh konsiderohen më shumë si simbol statusi, sesa si aksesor funksional.
Sipas të dhënave zyrtare të INSTAT, vetëm gjatë pesë muajve të parë të këtij viti janë importuar rreth 325 milionë lekë orë dore, që përkthehet në afërsisht 3.25 milionë euro. Krahasuar me të njëjtën periudhë të një viti më parë, kjo shënon një rritje prej 27% në vlerë raporton SCAN.
Por ndërkohë që vlera e importit është rritur, sasia fizike e orave të sjella në treg ka shënuar rënie.
Gjatë pesë muajve të parë të këtij viti janë importuar 34 ton ora dore, ndërsa në të njëjtën periudhë të vitit të kaluar kjo sasi ishte 44 ton.
Ky raport tregon qartë një orientim të tregut drejt orave më të shtrenjta dhe cilësore, duke reduktuar pjesën e produkteve më të lira apo imitacioneve.
Veç aspektit të luksit dhe statusit, vërehet gjithashtu se orët e klasit të lartë po shihen gjithnjë e më tepër edhe si formë alternative e investimit apo ruajtjes së vlerës së parasë.
Në një kohë kur tregjet financiare karakterizohen nga luhatje dhe pasiguri, blerja e orave të koleksionit apo modeleve të rralla vlerësohet nga një pjesë e konsumatorëve si mënyrë për të mbajtur të sigurt kapitalin e tyre.
Nga automjetet luksoze, tek aksesorët e dorës, duket se për një pjesë të shqiptarëve ora nuk shërben vetëm për të parë kohën, por edhe për të përcjellë një mesazh të qartë për kohën e tyre të suksesit financiar.
Marrë nga Skyweb.al
