Kush do ta drejtojë xhaminë e Namazgjasë? Është kjo pyetja që ditët e fundit ka marrë vëmendje pas lajmit për hapjen e shumëpritur të saj të enjten. Komiteti Mysliman Shqiptar thotë se xhamia do të drejtohet nga një fondacion që do të ketë një bord drejtues në krye të të cilit do të jetë myftiu i Tiranës, Gazment Teqja.
“Komuniteti Mysliman i Shqipërisë do të përfaqësohet nga Myftiu i Tiranës, z. Gazment Teqja, i cili do të jetë gjithashtu edhe kreu i bordit të fondacionit të përbashkët, mes KMSH dhe palës tjetër, që do të administrojë Xhaminë e Namazgjasë më tej” – thuhet në njoftimin e KMSH.
Një tjetër variant jep CNN Turk, një nga mediat më të mëdha në Turqi, sipas të cilit, drejtimin do ta marrë imami Enes Baştür.
“Presidenti Erdogan do të vizitojë Shqipërinë më 10 tetor. Presidenti Erdogan do të marrë pjesë në hapjen e Xhamisë së Namazgjasë, ndërtimi i së cilës ka përfunduar në Tiranë, kryeqyteti i Shqipërisë. Enes Baştür, i pari i Turqisë në recitimin e ezanit në vitin 2024, u emërua si imam i xhamisë së Namazgjasë, e cila do të vihet në shërbim me një hapje madhështore” – citon CNN Turk.
