Pandeli Carapuli është padyshim një prej atyre ndërtuesve, të cilën në leksikun publik njihen si “oligarkë”. Raporti i tij i ngushtë me kryeministrin Edi Rama e ka shndërruar atë në një prej përfituesve më të mëdhenj të lejeve publike.
Por, së fundmi, ditët arta të Carapulit 73-vjeçar kanë nisur të errësohen nga afera, në të cilat shfaqet emri i tij.
Prokuroria e Posaçme (SPAK) dyshon se Pandeli Carapuli, pronar i kompanisë së ndërtimit “Eurocol” është përfshirë në një mekanizëm për të fshehur një vilë të Belinda Ballukut, ish-zv.kryeministres dhe ish-ministres së Infrastrukturës, e marrë e pandehur për “shkelje të barazisë në tendera” dhe nën hetim për “korrupsion” e “pastrim parash”.
Prokurori Dritan Prençi ka siguruar prova, mbi të cilat ka ngritur dyshimin e arsyeshëm se Belinda Balluku ka marrë një vilë dy-katëshe në resortin “White Rocks” të ndërtuar nga Carapuli në zonën e Gjilekës, në Dhërmi.
Prokuroria e Posaçme thotë se vila, formalisht, është në pronësi të ish-futbollistit të Kombëtares, Igli Tare. Por, të dhënat e siguruara gjatë hetimit kanë treguar se ajo është në posedim të Ballukut, e cila e ka fituar, si korrupsion, pasi i ka siguruar “Eurocol” të Pandeli Carapulit një tender rreth 1 milionë euro, gjatë kohës që ajo drejtonte kompaninë publike “Albcontrol”.
Ndërkohë, prej më shumë se një muaji, biznesmeni Pandeli Carapuli e ka të ndaluar të udhëtojë jashtë Shqipërisë, në zbatim të një mase të caktuar nga Gjykata e Tiranës. Ai dyshohet për ndërtim të paligjshëm në një kompleks rezidencial në periferi të kryeqytetit.
Sarajet e Surrelit të Ramës
Pandeli Carapuli është një ndër të “preferuarit” e kryeministrit Edi Rama, aq sa ky i fundit i ka besuar ndërtimin e vilës së tij të banimit, në Surrel. Për nga madhësia dhe shtrirja e saj, banesa e kryeministrit njihet ndryshe edhe si “Sarajet e Surrelit”.
Kryeministri Rama nuk i ka bërë asnjëherë publike faturat për ndërtimin e banesës së tij familjare. Në deklaratat e pasurisë së tij është shënuar se godina është ngritur në disa sipërfaqe toke, të blera nga bashkëshortja e tij, Linda Rama, mbi bazën e të ardhurave të saj si konsulente financiare.
Por, nuk ka asnjë të dhënë publike se sa është paguar Carapuli për këtë shërbim në favor të qytetarit Edi Rama. Për kreun e opozitës, Sali Berisha, biznesmeni Pandeli Carapuli i ka ndërtuar falas “sarajet e Surrelit”, në këmbim të favoreve të tjera që ka marrë nga kryeministri Edi Rama.
Nën këtë diskurs akuzator, është gjendur shpesh edhe investimi për kompleksin “White Rocks”, në Dhërmi.
“Dhuratat” e Ramës për Carapulin
Në mars 2014, kur Rama kishte vetëm pak muaj kryeministrin, ai, në cilësinë e kryetarit të Këshillit të Rregullimit të Territorit (KRRT), miratoi lejen e ndërtimin për një resort turistik në Gjilekë të Himarës, në favor të “Eurocol” shpk, me pronar Pandeli Carapulin. Bëhet fjalë për të njëjtin kompleks, ku gjendet vila e dyshuar e fshehur e Belinda Ballukut.
Në mars të vitit 2019, Edi Rama, si drejtues i Komitetit të Investimeve Strategjike (KIS) i jep kompleksit të Carapulit statusin e “investitorit strategjik”, gjë që do të thoshte se projekti siguronte lehtësira infrastrukturore nga fondet e Buxhetit të Shtetit.
Vetëm pak muaj më pas, Edi Rama, tashmë si kryeministër, miraton Vendimin e Këshillit të Ministrave nr. 402, dt. 19 Qershor 2019, “Për lejimin e përdorimit të sipërfaqes përpara resortit, në funksion të realizimit të projektit “Ëhitë Rocks”.
Me këtë vendim, Rama i lejoi Carapulit që të shfrytëzojë për 20 vjet bregun para kompleksit turistik.
Kompleksi në Tiranë
Në vitin 2022, kompania “Eurocol” e Pandeli Carapulit merr leje ndërtimi nga kryebashkiaku, tashmë i arrestuar i Tiranës, Erion Veliaj, për ngritjen e kompleksit rezidencial “Park Life”, në zonën e Farkës.
Në vitin 2025, Bashkia e Tiranës i miratoi Carapulit kërkesën për ngritjen e një barriere zhurmë-bllokuese rreth këtij kompleksi.
Por, siç konstatoi prokuroria e Tiranës në një hetim të nisur në janar 2026, “gjatë verifikimeve në terren, rezultoi se ajo që duhet të ishte një “barrierë ndaj zhurmave”, në fakt ishte një mur beton-arme me gjatësi 100 metra i gjatë dhe me lartësi 4 metra. Një punim i tillë kërkon domosdoshmërisht leje ndërtimi, të cilën biznesmeni Carapuli nuk e kishte marrë”.
Për këtë arsye, Pandeli Carapuli u mor person nën hetim për veprën penale të “ndërtimit të paligjshëm” dhe ndaj tij u caktua nga gjykata e Tiranës masa “ndalim për dalje jashtë shtetit”.
Tashmë, Pandeli Carapuli është pjesë e dosjes hetimore që po zhvillon Prokuroria e Posaçme ndaj ish-zv.kryeministres, Belinda Balluku.
Marrë nga Boldnews.al
