Nga Patrick Lefelon
Kur bosi i drogës nga Anversa, Nordin El Hajjioui, u arrestua dy vjet më parë në Dubai dhe u dërgua me avion në Belgjikë, kriminelë të tjerë të drogës u larguan me shpejtësi nga Dubai. Ata u arratisën, ndër të tjera, drejt Turqisë, ku avokatë të zotë i pritën me krahë hapur. Kush investonte gjysmë milioni euro në pasuri të paluajtshme në disa rajone turke, merrte si bonus edhe një pasaportë turke. Avokatët turq i ndihmonin kriminelët e drogës të kalonin procedurat administrative. Çmimi fillestar për këtë ndërmjetësim: 50.000 euro.
Me pasaportën turke, kriminelët e drogës, që ishin në kërkim ndërkombëtar, ishin për një kohë të gjatë të sigurt se nuk do të ekstradoheshin. Turqia nuk i dorëzon shtetasit e saj. Ndër të tjerë, Bolle Jos Leijdekkers u fsheh për një kohë në Turqi. Vëllai i tij u arrestua atje dhe u ekstradua në Holandë.
Edhe dy të dyshuar që drejtësia i lidh me organizatën e drogës së Flor Bressers, u arratisën në vitin 2023 drejt Turqisë dhe morën shtetësinë turke. Bëhet fjalë për boshnjakun Sani A.M. (40 vjecc) dhe dorën e djathtë të tij shqiptare, Flamur S. (50 vjecc). Për shkak të presionit ndërkombëtar, shtetësia e tyre turke u hoq sërish, por kërkesa për ekstradim drejt Belgjikës mbeti pa rezultat.
Kjo do të ndryshojë këtë javë. Flamur S. është në listën për t’u ekstraduar në Belgjikë. Shqiptari Flamur S. është sërish një i dyshuar i rëndësishëm nga organizata e Bressers që bie në duart e drejtësisë belge.
Flamur S., i cili më parë jetonte në Deurne, sipas prokurorisë federale është një ndërmjetës i rëndësishëm në organizatën e Bressers. Aty ai kishte nofkën “Maradona”. Flamur S. drejtonte ekipet që nxirrnin kokainën nga kontejnerët. Ai gjithashtu bënte grumbullimin e parave. Nga shënimet e sekuestruara te Bressers rezulton se Flamur S. ka mbledhur rreth 17 milionë euro pagesa në Belgjikë dhe Holandë.
Procesi gjyqësor ndaj bosit të drogës Flor Bressers është pezulluar sepse gjyqtarët janë përjashtuar. Gjykata duhet të emërojë gjyqtarë të rinj që do ta rinisin procesin nga e para.
Flamur S. zakonisht vepronte me urdhër të boshnjakut Sani A.M., i cili gjithashtu u fsheh në Turqi. Boshnjaku, i cili kërkohet edhe nga Belgjika, megjithatë është zhdukur pa gjurmë.
Një tjetër kriminel droge nga Anversa që jeton i fshehur në Turqi dhe e kundërshton pafund ekstradimin e tij, është “Black”, Abdelilah El Messaoudi. Ai është dënuar me 22 vjet burg për trafik droge.
Marrë nga Dpgmedia.be
