Një firmë që operon kryesisht në Himarë dhe Sarandë, mjaft e preferuar nga ish-kryetari në burg i Bashkisë së Himarës Jorgo Goro dhe nga kryetari aktual i Bashkisë së Sarandës, Oltion Çaçi, është përjashtuar 1 vit nga tenderët. Shkak është bërë se ajo ka përdorur të dhëna të rreme, të dyshuara të falsifikuara, në një tender që ka fituar disa muaj më parë.
Sipas dokumenteve që disponon VoxNews, kjo firmë është në pronësi të znj. Fotini Rondo, teksa ka fituar dhjetëra tendera nga Bashkia Himarë, Bashkia Sarandë apo edhe Ujësjellësat e këtyre qyteteve. Gjatë kohës që Himara drejtohej nga Goro, djali i pronares Elton Rondo, punonte si jurist në Bashkinë e Himarës. Dhe kjo lidhje, e ndihmoi së tepërmi për të marrë kontrata të majme.
Ndërkohë, pas burgosjes së Goros, vëmendja e Fotinisë dhe Eltonit u përqendrua në Sarandë, atje ku dhe jetojnë. Në vitet e fundit, firma ka fituar tendera nga Bashkia dhe Ujësjellësi i Sarandës, ku një procedurë i “hëngri” edhe kokën.
Sipas APP-së, procedimi erdhi “për keqinformim për qëllime kualifikimi në procedurën e prokurimit me objekt ‘rikonstruksion i rrjetit të ujësjellësit të fshatit Çiflik dhe ndërtim pusi’”. Fondi limit i kësaj procedure ka qenë 37.892.769 lekë, ose rreth 380 mijë euro.
Tenderi është bërë nga shoqëria rajonale Ujësjellës- Kanalizime Sarandë sha, në datë 10 shtator 2024. “Arsyet e fillimit të procedimit administrativ ka nisur bazuar në shkresën datë 04 shkurt 2025, dërguar nga shoqëria ‘Mane/S’ shpk.
“Në përfundim të procedimit administrativ të nisur, u arrit në konkluzionin se ndodheshim në kushtet e nenit 78/1/a të LPP, ku parashikohet se: ‘Agjencia e Prokurimit Publik përjashton një operator ekonomik nga e drejta për të fituar kontrata publike për një periudhë nga 3 deri në 3 vjet për keqinformim dhe dorëzim të dokumenteve, që përmbajnë të dhëna të rremë për qëllime kualifikimi”.
Në fund, APP vendosi të përjashtojë operatorin ekonomik “Cogren” shpk, nga e drejta për të fituar kontrata publike, për 12 muaj nga hyrja në fuqi e këtij vendimi.
Disa muaj më parë u finalizua tenderi që skualifikoi firmën e familjes Rondo. Mësohet se, në atë procedurë mori pjesë firma “MANE/S”, e cila u ankua më pas, me vlerë rreth 300 mijë euro, BOE “COGREN” dhe “JOGI” me vlerë 315 mijë euro dhe “ASI-2A CO” me ofertë 335 mijë euro.
Ofertën më të ulët e pati firma “MANE/S”, por që më pas u skualifikua, teksa pati vendime edhe nga KPP por që nuk ndryshuar rezultatin dhe renditjen. Ndërkohë, kohë më vonë, firma që ofroi më pak u ankua dhe “zbuloi” se Rondot kanë paraqitur dokumente të rremë.
Ndërkohë, në të njëjtën periudhë dhe nga i njëjti institucion, firma “Cogren” fitoi një tjetër procedurë nga Ujësjellës Kanalizime Sarandë. Në dokumentet që ka hulumtuar VoxNews bëhet fjalë për procedurën “ndërtim rrjeti shpërndarës në fshatin Gjashtë, Bashkia Sarandë” me fondi limit 435 mijë euro.
Edhe në këtë procedurë, firma e Rondove nuk pati ofertë më të ulët, por sërish fitoi në mënyrë tepër të dyshimtë. A mos vallë edhe në këtë procedurë paraqiti të dhëna dhe dokumente të rreme?!
Objekti i procedurës ishe “rikonstruksion të rrugëve të brendshme dhe shkallare në lagjen mbi rrugën e pestë”. Fondi i kësaj procedure ishte 125 mijë euro me një kohëzgjatje prej 2 muajsh, ku rrugët duhet të ishin gati në maj 2025, kur edhe u bënë zgjedhjet parlamentare.
Ndërkohë për vite me radhë, firma “Cogren” fitonte lehtësisht tendera në Bashkinë e Himarës, gjatë kohës që ajo bashki drejtohej nga Jorgo Goro, tashmë në qeli për abuzime me detyrën. Në Himarë Rondot fitonin tendera për ujësjellësa, pastrime, rrugë e madje edhe mirëmbajtje varrezash.
Marrë nga VoxNews.al
