Atmosfera e tensionuar jashtë gjykatës së Stambollit, aty ku mijëra mbështetës të Ekrem Imamoglu janë mbledhur dhe po brohorasin në mbështetje të kryebashkiakut të Stambollit, i cili doli sot për herë të parë para togave të zeza pasi u arrestua nën akuzat për terrorizëm.
Pavarësisht ndalimit të tubimeve, i cili u zgjat deri më 27 mars, mbështetësit e Imamoglus po qëndrojnë jashtë gjykatës, ndërsa procedurat me 34 hetuesit dhe 91 të pandehurit (përfshi Imamoglun) pritet të zgjasin gjithë natën.
Forcat e policisë e kanë kthyer pallatin e drejtësisë në një fortesë pasi janë përforcuar me 5000 kolegë të tyre nga krahina të tjera të vendit, për të ruajtur qetësinë dhe rendin.
Imamoglu, i cili u arrestua të mërkurën për “korrupsion” dhe “mbështetje të një organizate terroriste”, mbërriti në Gjykatën e Caglayan në Stamboll pasditen e sotme për t’u paraqitur para prokurorit, i cili do të vendosë për vazhdimin ose jo të masës së paraburgimit të kryebashkiakut, i cili është kundërshtari kryesor i presidentit turk Rexhep Taip Erdogan.
Kryebashkiaku i Stambollit i ka quajtur akuzat “imorale dhe të pabaza” në polici, sipas një deklarate të lëshuar sot nga bashkia e qytetit turk.
“Akuzat joetike dhe të pabaza ndaj meje, nga raportet e sajuara deri tek koha e hetimeve, synojnë të cenojnë reputacionin dhe besueshmërinë time. Ata që qëndrojnë pas kësaj strategjie do të duhet të mbajnë përgjegjësi për veprimet e tyre para gjykatave. Unë do të ngre një padi kundër individëve dhe institucioneve të përfshira në këtë. Ky proces jo vetëm që dëmton reputacionin ndërkombëtar të Turqisë, ai shkatërron gjithashtu besimin te drejtësia dhe ekonomia”, theksoi kryebashkiaku, sipas deklaratës.
Ndërkohë, indeksi i Bursës së Stambollit ra më shumë se 16.5% këtë javë, një rënie e pa parë që nga viti 2008, sipas analistëve.
Kryebashkiaku shprehet se “ndjen fuqinë e miliona njerëzve” që e mbështesin. “Sido që të ndodhë, do të luftoj për drejtësinë dhe të vërtetën me mjete ligjore deri në fund të jetës sime”, deklaroi ai.
Marrë nga Syri.net
