Reperi Rigels Rajku, i njohur ndryshe si Noizy, është shpallur në kërkim nga policia e Kosovës, me urdhër të Prokurorisë në Pejë.
Mediat vendase raportojnë se artisti nuk është paraqitur në polici, pas sherrit që ndodhi pak ditë më parë.
Lajmin e ka konfirmuar Shkodran Nikçi, zëdhënës i Prokurorisë në Pejë.
“I njëjti nuk është paraqitur në stacionin policor për intervistim, i bëjmë apel këngëtarit që të paraqitët tek organet kompetente”, ka thënë Nikçi.
Këngëtari shqiptar akuzohet së bashku me disa persona të tjerë se dhunuan brutalisht Muhamet Isenin, i njohur ndryshe në “TikTok” si Medi, bashkë me mikun e tij Bekim Hardërgjonajn brenda një klubi nate në Pejë në orët e para të mëngjesit të 2 gushtit.
Reperi, në një postim në “InstaStory”, ka njoftuar anulimin e performancës së tij në një klub në Ferizaj, për shkak se po shoqërohej për në polici.
Nga ana tjetër Medi Iseni është shprehur se “u pre në besë” nga reperi tjetër shqiptar, Arkimed Lushaj, i njohur me emrin e artit si Stresi, i cili dyshohet se e kishte ftuar për ta takuar, por ndërkohë ishte një “kurth”, për ta vendosur në të njëjtin ambient me Noizy-n dhe grupin e tij.
