Agjencia për Zhvillim Bujqësor dhe Rural përveçse ka damkën e korrupsionit dhe vjedhjes së mbi 30 milionë eurove nga fondet e Bashkimit Europian përmes programit IPARD, së fundi ka ngelur edhe pa drejtues.
Pak ditë më parë mësohet se është larguar nga kjo detyrë Oltjon Muzaka, i emëruar në kohën kur Ministrinë e Bujqësisë e drejtonte Frida Krifca. Kjo e fundit dyshohet si përgjegjësja kryesore për të gjithë skemën e vjedhjes së fondeve europiane të dedikuara për Shqipërinë.
Me ikjen e Muzakës, në vend të tij është komanduar përkohësisht Ardita Kuçi, e cila ka qenë më parë punonjëse në këtë agjenci që tashmë pothuajse nuk bën asgjë përvcse administron fondet e Skemës Kombëtare për sektorin e bujqësisë.
Zyra antikorrupsion në BE, OLAF, ka konfirmuar zyrtarisht vjedhjen e mbi 30 milionë eurove dhe për këtë ka bllokuar vijimin e programit.
Për aferën në fjalë zyrtarisht ka edhe një hetim paraprak nga SPAK, e konfirmuar kjo një ditë më parë në Kuvend nga kreu i Prokurorisë së Posaçme. Ndërkohë sot mazhoranca bllokoi në Kuvend një mocion për debat të kërkuar nga opozita pikërisht për këtë çështje. Pasi e largoi Frida Krifcën nga Ministria e Bujqësisë, Rama e ka marrë ish-ministren në kabinetin e tij të këshilltarëve.
