Gjykata e Posaçme e Shkallës së Parë për Korrupsionin dhe krimin e Organizuar shpalli të martën më 31 mars vendimin për deklarimin fajtor të të pandehurit Ylli Baruti për blerje të votave në bashkëpunim me persona të tjerë, gjatë fushatës elektorale të zgjedhjeve vendore të vitit 2019.
Trupi gjykues i përbërë nga gjyqtarët Engjëllushe Tahiri, Besmir Stroka dhe Etleva Deda vendosi dënimin e Barutit me 1 vit e 6 muaj burgim, që në aplikim të gjykimit të shkurtuar u reduktua në 1 vit heqje lirie. Po ashtu, u vendos pezullimi i dënimit dhe vendosja në shërbim prove për dy vjet.
Në nëntor të vitit të kaluar, u deklaruan fajtorë edhe bashkëpunëtorët e Barutit, zyrtari i drejtorisë së Përgjithshme të Agjencisë Shtetërore të Kadastrës, Dritan Stoka dhe kryeplaku i Lagjes së Re Sauk, Agim Osma, të akuzuar për “Ushtrim të ndikimit të paligjshëm ndaj personave që ushtrojnë funksione publike” dhe “Korrupsion aktiv në zgjedhje”. Stoka dhe Osma u dënuan me nga dy vjet heqje lirie.
Sipas SPAK, të gjykuarit kanë kërkuar nga persona të ndryshëm përgatitjen e listave të zgjedhësve duke i detyruar për të votuar ose duke përcaktuar mënyrën e votimit, kundrejt përfitimeve të parregullta; qëndrimin në punë apo edhe nxjerrjen e lejeve të legalizimit për ndërtimet informale të votuesve në zonën e Saukut, Tiranë.
Po ashtu, nga bisedat e përgjuara, ka rezultuar se të pandehurit kanë kërkuar dhe marrë përfitime të parregullta për të ndikuar në pajisjen me leje legalizimi të ndërtimeve pa leje të disa shtetasve.
Në zgjedhjet e vitit 2019, opozita nuk mori pjesë dhe partia e vetme realisht në garë ishte Partia Socialiste, e cila i fitoi zgjedhjet.
Marrë nga Reporter.al
