Teatri i Kukullave në Tiranë nuk do të shndërrohet në qendër kulturore hebraike dhe as nuk do të ndryshojë destinacion. Këtë e ka bërë me dije vetë ministri Blendi Gonxhja, duke përgënjeshtruar pretendimet që po qarkullojnë në media dhe rrjetet sociale për të ardhmen e godinës historike.
“Pretendimet që po qarkullojnë në media dhe rrjete sociale për ndryshimin e funksionit të godinës historike të Teatrit të Kukullave nuk qëndrojnë. Jo se qendrat e kulturave të tjera janë herezi, aspak, por se është e gabuar të përdoret një realitet kaq simbolik duke e përshkruar si të zëvendësueshëm nga diçka që për shkak të aktualitetit do krijonte një ngarkesë të re që të ushqente fantazi e paranoja absurde”, shprehet ministri Gonxhja.
Reagimi i Gonxhes vjen pasi në shumë faqe interneti u raportua për intervistën e gazetarit Blendio Fevziu, i cili i ftuar në podcastin “Pjaca, në Media Radar”, shprehu keqardhjen e tij për një vendim që ai thotë se, është bërë publik, kthimin e Teatrit të Kukullave në qendër hebraike pa patur asnjë lidhje me këtë kulturë.
Duke rrëfyer edhe historikun e kësaj godine ku u shpall Mbretëria Shqiptare, Fevziu tha se nuk ka asnjë arsye përse të kthehet në qendër hebraike.
Marrë nga Newsbomb.al