Kryeministri spanjoll, Pedro Sanchez është zhytur sërish në një skandal korrupsioni.
Këtë herë në qendër të aferës është numri tre i partisë së tij, Santos Cerdan, i cili akuzohet se ka keqmenaxhuar një shumë prej të paktën 620 mijë eurosh.
Sanchez u përfshi në një skandal edhe një vit më parë, kur e shoqja u akuzua për korrupsion.
Por atëherë, në mënyrë të paprecedent, në mbrojtje i doli edhe kryeministri shqiptar, Edi Rama.
“Ju keni të gjithë mbështetjen tonë në këto kohë ku më shumë se kurrë nevojitet qëndrueshmëri ndaj gënjeshtarëve, shpifësve dhe manipuluesve të fakteve nga skajet e sferës politike. Është nder të qëndroj pranë jush,” deklaroi Rama.
Por Sanchez këtë herë rrezikon shumë, pasi në lojë është vetë fati i Partisë Socialiste të Spanjës.
Politico raporton se socialistët kërkojnë zgjedhje të parakohshme, edhe pse e dinë se do humbasin. Por nëse Sanchez qëndron akoma në pushtet deri në zgjedhjet normale të vitit 2027, partia e tyre jo vetëm që do nuk do fitojë, por do tkurret ndjeshëm.
“Politikanët socialistë nga qytetet dhe rajonet e Spanjës duan që kryeministri në vështirësi, Pedro Sánchez, të thërrasë zgjedhje të parakohshme kombëtare, përballë skandaleve të shumta për korrupsion — edhe pse e dinë që partia e tyre pothuajse me siguri do t’i humbasë ato.
Publikisht, shumica e kryetarëve socialistë të bashkive dhe presidentëve rajonalë e mbështesin Sánchez-in, por një numër gjithnjë e më i madh në mënyrë private druhet se ai tani është një barrë dhe se skandalet për korrupsion do të dëmtojnë kandidatët në nivel komunal dhe rajonal gjithashtu.
Nëse kryeministri këmbëngul të përfundojë dy vitet e mbetura të mandatit, ata argumentojnë se votuesit e zemëruar do t’i ndëshkojnë socialistët në të gjitha nivelet. Zgjedhjet kombëtare, rajonale dhe komunale janë aktualisht të planifikuara për në mes të vitit 2027,” shkruan Politico.
Marrë nga Politico.eu
