Kryeministri i Kosovës, Albin Kurti, fajësoi Serbinë për mungesën e përparimit në bisedimet e normalizimit të ndërmjetësuara nga BE-ja ndërmjet dy vendeve, duke akuzuar presidentin e saj Aleksandar Vuçiç se strehoi liderin e një inkursioni të armatosur në Kosovë dhe se nuk e zbatoi një marrëveshje paqeje.
Kështu shkruan Politco.eu, pasi Kurti zhvilloi një bisedë me Nick Vinocur të Playbook të kësaj medie.
Pavarësisht se ndanë të njëjtën tryezë në Bruksel javën e kaluar, dy liderët ballkanikë nuk folën drejtpërdrejt dhe kanë vazhduar të shkëmbejnë thumba.
Pasi Vuçiç tha se nuk kishte “asnjë marrëdhënie” me Kurtin, lideri i Kosovës u kundërpërgjigj: “Kur ai flet, unë nuk ndërhyj. Sa herë që flas, ai ndërhyn”.
“Qasja e Beogradit nuk është normalizimi i marrëdhënieve me Kosovën”, tha Kurti, një ditë pasi mori pjesë në një drekë në Bruksel të organizuar nga Komisioni uvropian së bashku me homologun e tij serb.
“Si i thanë po Marrëveshjes [Ohrit] por refuzuan ta nënshkruajnë atë?”, ka pyetur Kurti.
Politico ka shkruar edhe për akuzat që Beogradi ia bën Prishtinës për “të drejtat e serbëve në Kosovë”.
“Në një intervistë të fundit me POLITICO, Vuçiç bëri thirrje për të përfunduar zgjedhjet komunale në rajonin e Kosovës, të cilat ishin bojkotuar nga serbët lokalë”, shkruan mediumi.
Kurti në këtë bisedë akuzoi qeverinë serbe për shkeljen e marrëveshjes dhe për strehimin e Milan Radoiçiqit.
“Radoiçiç është i lirë në Serbi i mbrojtur dhe financuar nga Serbia”, tha Kurti.
Kurti drejtoi gishtin edhe kah kryediplomati i BE-së Josep Borrell dhe përfaqësuesi special i bllokut në Ballkanin Perëndimor, Miroslav Lajčák.
“Problemi është se zoti Borrell dhe Lajčák nuk i kanë rënë pipit kur ka pasur shkelje. Imagjinoni një arbitër që ec në një fushë futbolli pa pip”.
E kontaktuar nga Playbook për koment, zyra e ministrit të Jashtëm serb Marko Gjuriç dërgoi një dokument tetëfaqesh që akuzon kryesisht Prishtinën për dështimin e krijimit të Asociacionit të komunave me shumicë serbe në veri të vendit.
“Kosova po përdor [argumentin], ‘së pari na duhen nënshkrimet’ vetëm për të luajtur lojën e fajit me Beogradin”, tha ajo.
“Megjithatë Kosova vazhdon të injorojë të gjitha obligimet e saj të dialogut”.
Si përfundim, Politico shkruan se “gjërat nuk po përmirësohen mes Prishtinës dhe Beogradit, gjë që nuk do të ndihmojë asnjërin vend në rrugën e anëtarësimit në BE – ashtu si Komisioni po përgatitet të zbulojë një seri raportesh të detajuara mbi perspektivat e vendeve kandidate”.
Marrë nga Politico.eu
