Në mbledhjen e Konferencës së Kryetarëve, kryetari i grupit socialist, Taulant Balla tha se kërkesa e demokratëve nuk përmbushte kriteret e rregullores së Kuvendit.
“Nuk i njohim si përfaqësues të protestës,” tha ai për mediat pas mbledhjes dhe pretendoi se PD gjithashtu i kishte deformuar kërkesat e protestuesve.
Ndërkohë, ai aludoi pa ofruar prova se protestat apo partitë politike që mund të formohen nga protesta kishin lidhje me shtete që konsiderohen si jomiqësorë me Shqipërinë, si Irani dhe Rusia.
Grupi Parlamentar demokrat kërkoi zhvillimin me urgjencë te një mocioni me debat e konsideruar se protestat e vazhdueshme duhej të merreshin në konsideratë nga parlamenti.
Në kërkesë u jepej zë disa prej pikave të parashtruara nga protestuesit, si dorëheqja e qeverisë, shfuqizimi i kuadrit ligjor për investimet strategjike, “Paketa e Maleve”, ndryshimet në ligjin për zonat e mbrojtura dhe ndryshimet në ligjin për trashëgiminë kulturore shqiptare.
Kryetari i grupit të PD-së, Gazment Bardhi tha se kërkesa përçonte shqetësimin e qytetarëve për të kërkuar llogari nëse do të adresohen këto shqetësime nga institucionet.
“Protesta e qytetarëve shqiptarë ka marrë vëmendjen e eurodeputetëve në seancën e fundit plenare të Parlamentit Europian. I vetmi Parlament në rruzullin tokësor që nuk i ka kushtuar asnjë vëmendje shqetësimeve të qytetarëve prej 26 ditëve në shesh është Parlamenti i Shqipërisë”- tha ai për mediat.
Konferenca e Kryetarëve po ashtu nuk futi në kalendar të punimeve një tjetër kërkesë të opozitës që kërkonte mocion me debat mbi rezolutën e fundit të Parlamentit Europian ku adresohen problematikat e progresit të vendit tonë drejt integrimit, me një nen të posaçëm që kërkon moratorium për ndërtimet në zonat e mbrojtura dhe anulimin e dispozitave ligjore që mundësojnë këto ndërtime.
Marrë nga Reporter.al
