Presidenti i Republikës, Bajram Begaj nuk humbi kohë dhe pak orë pasi Këshilli i Ministrave e njoftoi për vakancën e krijuar në Bashkinë Himarë për shkak të konstatimit të pavlefshmërisë së mandatit të Fredi Belerit, shpalli zgjedhjet e reja për kryetar të kësaj njësie vendore. Votimet do të mbahen të dielën e 4 gushtit dhe sipas kreut të shtetit kjo kohë është e mjaftueshme për organizimin e zgjedhjeve dhe për fushatën elektorale.
“Presidenti i Republikës, Bajram Begaj dekretoi datën 4 gusht 2024 për zhvillimin e zgjedhjeve për kryetar bashkie në bashkinë Himarë, si alternativa më e mirë që pajton nevojën për përgatitjen dhe zhvillimin e një fushate të rregullt zgjedhore dhe nevojën për përgatitjen optimale të administratës zgjedhore, me kushtet, rrethanat dhe ngarkesën që sjell sezoni turistik për bashkinë Himarë, si njësi bregdetare e qeverisjes vendore”.
Më herët me pranga në duar, Fredi Belerit iu dha leje e posaçme nga Drejtoria e Burgjeve që të ishte këtë të premte në mbledhjen e KQZ, ku iu komunikua përfundimi i mandatit të kryetarit të Bashkisë. Mandat që nuk e ushtroi dot asnjë ditë dhe që nuk arriti të bënte as betimin si kryebashkiak pasi ndodhej në burg me akuzën e blerjes së votave, për cilën u dënua me 2 vite burg.
Si Beleri ashtu dhe përfaqësuesi ligjor i koalicionit opozitar dhe kryetari i partisë që e propozoi, argumentuan se KQZ nuk kishte kompetencë për shqyrtimin e kërkesës për ndërprerjen e mandatit të Belerit. Sipas tyre në rastin e Belerit duhej të zbatohej ligji për vetëqeverisjen vendore ku parashikohet shkarkimi nga kryeministri në rast të dënimit me vendim të formës së prerë.
Argumente që i përballen me përfaqësuesin e Partisë Socialiste, si dhe Komisionerin Shtetëror të Zgjedhjeve sipas të cilëve vendimmarrja në këtë rast ishte në tagrin e KQZ.
