Kryetari i Dumës ruse, Vjacheslav Volodin, është vënë në qendër të vëmendjes pasi, në një bisedë me presidentin Vladimir Putin, ka rrëfyer një histori për një “ministër të korruptuar të inteligjencës artificiale” në Evropë.
Bëhet fjalë për ministren shqiptare të Shtetit për Inteligjencën Artificiale Diella, për të cilën Volodin tha se ishte shkarkuar pasi kishte marrë një ryshfet prej 14 bitcoin gjatë një tenderi për ndërtimin e një autostrade. Burimi i lajmit ishte platforma satirike kroate Newsbar, e ngjashme me faqen ruse politike Panorama.
Volodin jo vetëm që ia transmetoi Putinit këtë histori si shembull të “korrupsionit të AI-së”, por publikoi edhe videon e bisedës në kanalin e tij në Telegram me mbishkrimin: “Në Bashkimin Evropian, një AI i emëruar si ministër ka përvetësuar fonde.”
Diella është ministrja e parë virtuale, jo vetëm në Shqipëri, por në të gjithë botën. Dekretimi i saj në legjislaturën e 4 të qeverisë Rama bëri bujë ndërkombëtare ndërsa u cilësua si një avancim në integrimin e teknologjisë në një shtet të vogël të Ballkanit Perëndimor.
Marrë nga Newsbomb.al
