Arrestimi në Abu Dabi i një prej drejtuesve të së ashtuquajturës mafia shqiptare në Amerikën Latine, Dritan Gjika, ka sjellë edhe akuza për tentativa vrasje nga Presidenti i Kolumbisë, Gustavo Petro.
Përmes një postimi në rrjet rrjetin social “X”, ai e quajti strukturën e këtij grupi kriminal si “junta e narkotrafikut” me seli në Abu Dabi
Presidenti deklaroi se, grupi mafioz kontrollon një rrjet prokurorësh dhe portin strategjik të Buenaventurës, përmes lidhjeve të krujuara tek njësia hetimore kolumbiane. Ai ka lëshuar akuza se pikërisht me urdhër të këtij grupi u tentua edhe ekzekutimi i tij në disa raste.
“Ky quhet “bordi i narkotrafikut”, me seli në Abu Dabi. Kontrollojnë një rrjet prokurorësh dhe, përmes CTI-së, portin e Buenaventurës. Ata janë autorët e vrasjes së prokurorit paraguaian Pecci dhe arritën të fshehin urdhëruesit e vërtetë të këtij krimi brenda prokurorisë. Kanë tentuar të më vrasin disa herë, por pa sukses”, shkruan presidenti kolumbian Gustavo Petro, postim të cilin e shoqëron edhe me një skemë të publikuar nga InSight Crime për drejtuesin dhe detyrat që kanë anëtarët e këtij grupi kriminal.
Në krye të kësaj sipërmarrje kriminale, përveçse Dritan Gjikës është edhe emri i Rubén Cherres.
Poshtë tyre rënditen edhe një sërë personash të tjerë, një pjesë e të cilëve pronarë kompanish që dyshohen se kryejnë një rol të rëndësishëm në trafikun ndërkombëtar të kokainës, por edhe të pastrimit të parave.
Mos këtyre emrave ndodhet edhe emri i një tjetër shqiptari, E.S. i përfolur edhe më herët si një nga personat kyç të përfshirë në mafian shqiptare në Amerikën Latine.
Sipas një raporti të publikuar nga InSight Crime, dy figura kryesore të këtij rrjeti – shqiptari Dritan Gjika dhe ekuadoriani Mario Sánchez Rinaldi – kanë ngritur një sistem kompleks kompanish në Ekuador, që përdoren për trafik droge dhe pastrim parash. Në skemë përfshihen edhe emra të tjerë si Rubén Cherres dhe Julio Lalangui.
Këto kompani veprojnë në sektorë të ndryshëm si bujqësia, ndërtimi, mineralet e çmuara, prodhimi i mishit dhe kultivimi i kanabisit, duke u përdorur si fasadë për transportin e kokainës drejt tregjeve ndërkombëtare.
Pak ditë më parë edhe presidenti i Venezuelës, Nicolás Maduro, lëshoi paralajmërime të ngjashme, duke akuzuar anëtarë të mafias shqiptare për përpjekje dhe ndërhyrje në zgjedhjet presidenciale të vendit.
Këto deklarata po shtojnë presionin për një reagim ndërkombëtar ndaj këtij rrjeti kriminal, që po fiton terren në zemër të Amerikës Latine.
Marrë nga Syri.net
