Presidentja e Kosovës Vjosa Osmani bëri thirrje dje që të ruhet siç tha integriteti i procesit zgjedhor të 9 shkurtit, mes kritikave me të cilat po përballet Komisioni Qendror i Zgjedhjeve për vonesat në numërimin votave të hedhura të dielën dhe problemet që u shfaqen në faqen internetit të këtij institucioni në publikimin e rezultateve të partive politike.
Në komunikatë citohet presidentja Osmani të ketë kërkuar që të ndërmerren të gjitha masat e nevojshme për të mbrojtur procesin zgjedhor dhe për të garantuar respektimin e plotë të vullnetit të qytetarëve duke rikonfirmuar çdo votë edhe nëpërmjet numërimit me dorë, përveç atij të bërë në sistemin elektronik.
Edhe koalicioni i organizatave të shoqërisë civile për vëzhgimin e zgjedhjeve, Demokracia në Veprim, i ka bërë thirrje Komisionit Qendror të Zgjedhjeve që pa vonesa dhe në mënyrë transparente të ndajë informacione për ecurinë e procesit të numërimit duke nënvizuar se duke mos i “ndarë informatat me kohë dhe në mënyrë transparente, KQZ-ja do të mund të dëmtojnë besimin e qytetarëve në rezultatet e zgjedhjeve, gjë që është e papranueshme, sidomos pas një dite të zgjedhjeve demokratike”.
Ndërsa vazhdon numërimi i votave të mbetura, vëzhguesit thonë se rezultati i zgjedhjeve ka lënë të hapura shumë mundësi për formimin e qeverisë së re të vendit. Nëse lëvizja Vetëvendosje nuk siguron koalicion me ndonjë nga partitë opozitare do ta ketë të vështirë të formojë qeverinë me deputetët e pakicave.
Deri tani kjo lëvizjë e cila prin me rreth 41 për qind të votave, ka hedhur poshtë çdo mundësi bashkëpunimi me partitë opozitare. Dy nga partitë opozitare Partia Demokratike dhe Aleanca për Ardhmërinë e Kosovës janë shprehur kundër ndonjë koalicioni me partinë në pushtet por të hapura për negociata me partitë e opozitës. Lidhja Demokratike e Kosovës thotë se rezultati i së dielës nuk është rezultat ndryshimi për Kosovën dhe do ta respektojë atë.
Vëzhguesit thonë se partitë politike duhet të gjejnë një rrugë bashkëpunimi për ndërtimin e institucioneve të reja pas certifikimit të rezultateve, pasi vendi përveç sfidave të brendshme mund të përballet edhe me sfida shumë më të mëdha në rafshin e jashtëm për shkak të ndryshimeve që po ndodhin në botë.
Marrë nga VOA (Zëri i Amerikës)
