Ulja e pragut të TVSH-së nga 10 milionë në 5 milionë lekë ka shkaktuar kundërshtimin e përfaqësuesve të profesioneve të lira, të cilët paralajmëruan se do t’i drejtohen sërish Gjykatës Kushtetuese nëse ndryshimet ligjore miratohen në formën aktuale.
Sipas tij, përfshirja në skemën e TVSH-së do të godasë veçanërisht profesionistët që ofrojnë shërbime, si avokatët, dentistët dhe audituesit, pasi rritja e kostos nuk mund t’i transferohet gjithmonë konsumatorit.
Alushaj ngriti shqetësime edhe për efektin prapaveprues që, sipas tij, kanë ndryshimet e propozuara për TVSH-në dhe dividendin, duke argumentuar se cenojnë sigurinë juridike.
Ai paralajmëroi se profesionistët e lirë janë të gatshëm të ndjekin të njëjtën rrugë ligjore si në rastin e tatimit mbi të ardhurat: “ Nëse ky ligj kalon në këtë formë, ka disa mangësi që duhen goditur në Gjykatën Kushtetuese”, tha Alushaj, duke kërkuar reflektim nga ligjvënësit
Ndërkohë, kontabilisti Artur Papajani paralajmëroi se ulja e pragut të TVSH-së mund të nxisë informalitetin, në vend që ta luftojë atë.
Ai kundërshtoi argumentin se ulja e pragut do të ndihmojë në luftën kundër informalitetit, duke theksuar se bizneset që preken janë subjekte të regjistruara.
Papajani propozoi që pragu i TVSH-së të vendoset në 8 milionë lekë, duke iu referuar përllogaritjeve që, sipas tij, janë bërë nga Fondi Monetar Ndërkombëtar. Ai kërkoi gjithashtu që të vlerësohen kostot që do të kenë bizneset dhe administrata tatimore nga zbatimi i skemës së re.
Sipas tij, ndryshimi i pragut rrezikon të prekë edhe një pjesë të fermerëve, të cilët mund të humbasin përfitimet nga skema e kompensimit.
Avokati Alushaj kundërshtoi edhe pretendimin se administrata tatimore është e përgatitur për zbatimin e ndryshimeve, duke përmendur gjobat e pajustifikuara, moskthimin e përgjigjeve dhe shtyrjen e afateve.
Diskutimet për ndryshimet fiskale u shoqëruan edhe me një debat mes avokatit Lulzim Alushaj dhe deputetit socialist Erion Braçe.
Marrë nga Top Channel