Kryeministri Edi Rama ka zhvilluar sot një takim me komunitetin shqiptar në Michigan. • Por takimi ishte i censuruar, ku lideri i qeverisë kishte vendosur të transmetonte vetëm fjalimin e tij dhe asnjë pjesë nga kundërshtimet e pjesëmarrësve.
Gjatë fjalës së tij, Rama foli për protesta në Shqipëri, vendimin e Gjykatës Speciale ndaj ish-krerëve të UÇK-së dhe diasporën.
Duke komentuar protestat, Rama tha se flamingoja u kthye në një figurë të njohur publike në Shqipëri, duke dalë nga laguna e Zvërnecit e duke tërhequr vëmendje edhe ndërkombëtare. Kryeministri madje pranoi se flamingot pushtuan Bulevardin në Tiranë. Sipas tij, askujt nuk ia merrte mendja se një flamingo do ta kthente Shqipërinë në një adresë debati për natyrën zhvillimin e turizmin.
Rama foli edhe për shqiptarët që e pritën me protesta në SHBA, duke thënë se do preferonte t’i kishte përballë për të dëgjuar kundërshtitë e tyre dhe për tu dhënë përgjigje. Gjatë fjalës së tij, ai theksoi gjithashtu se kërkesa për më shumë nga qeveria dhe shteti duhet të shoqërohet edhe me një kërkesë më të madhe ndaj vetes dhe mënyrës se si shqiptarët përballen me mendimet ndryshe.
Sa i përket vendimit të Gjykatës Speciale për ish-drejtuesit e UÇK-së, Rama e cilësoi si një varrosje për së gjalli, ndërsa tha se i takon institucioneve të Kosovës ta refuzojnë politikisht atë.
Një pjesë të fjalës ia kushtoi edhe diasporës, ku njoftoi se qeveria ka nisur zbatimin e Strategjisë Kombëtare të Diasporës 2030 dhe se po krijohet Regjistri Kombëtar i Diasporës.
Rama e krahasoi Shqipërinë me një “kantier në transformim”, ndërsa tha se, pavarësisht vonesave dhe gabimeve që duhen korrigjuar, procesi i ndryshimit vazhdon.
Marrë nga Dosja.al
