Në Partinë Socialiste, Edi Ramës mund t’i mjaftojnë pak minuta për të larguar dikë nga forumet drejtuese. Nuk nevojitet as votim, as ndonjë procedurë e dukshme. Por në rastin e Elisa Spiropalit, kryeministri duket se ka harruar një hollësi: statutin e partisë që drejton.
Në mbledhjen e Asamblesë Kombëtare, Rama kërkoi largimin e Spiropalit dhe Plarent Ndrecës nga forumet e PS-së. Pavarësisht kundërshtimeve që u shprehën në mbledhje, largimi u shpall nga Sekretari i Përgjithshëm, Blendi Klosi, i cili pranoi se nuk ishte zhvilluar votim.
Por a mund të përjashtohet Elisa Spiropali nga Asambleja Kombëtare vetëm me urdhrin e Ramës?
VNA është konsultuar me variantin përfundimtar të statutit të miratuar të Partisë Socialiste, një dokument që nuk gjendet i aksesueshëm publikisht online.
Neni 37, pika 2, përcakton shprehimisht se anëtarë ex officio të Asamblesë Kombëtare janë edhe anëtarët e partisë që kanë mbajtur më parë funksionin e Kryetarit të Kuvendit.
Elisa Spiropali e ka mbajtur këtë funksion. Për rrjedhojë, anëtarësia e saj në Asamblenë Kombëtare nuk buron nga ndonjë votim apo emërim i kryetarit të PS-së, por drejtpërdrejt nga statuti.
Ndërkohë, neni 38 përcakton se Asambleja Kombëtare zgjedh Kryesinë, ndërsa neni 22 parashikon shkarkimin nga organet e zgjedhura partiake si masë disiplinore, sipas procedurave përkatëse.
Kështu, Elisa Spiropali mund të mos jetë më anëtare e Kryesisë së PS-së, por sipas statutit ajo mbetet anëtare e Asamblesë Kombëtare, për shkak të funksionit të saj të mëparshëm si kryetare e Kuvendit.
Nëse do të marrë pjesë në mbledhjen e ardhshme të Asamblesë, nëse do ta kundërshtojë vendimin e Ramës apo do ta pranojë në heshtje përjashtimin e shpallur, kjo mbetet për t’u parë.
Deri atëherë, Partia Socialiste gjendet përballë një situate të pazakontë: kryetari e ka shpallur Spiropalin të larguar nga forumet, ndërsa statuti i partisë vazhdon t’i rezervojë një vend në Asamblenë Kombëtare.
Marrë nga VNA.al