Departamenti amerikan i Shtetit ka konfirmuar, se vendet e Ballkanit janë përfshirë në kontaktet diplomatike të administratës amerikane në kuadër të një strategjie më të gjerë për dëbimin e shtetasve të huaj pa status të rregulluar në SHBA.
Në një përgjigje zyrtare, Departamenti i Shtetit nuk komentoi raportimet e Bloomberg se administrata e presidentit Donald Trump po përpiqet të bindë shtetet e Ballkanit, përfshirë Serbinë dhe Kosovën, të pranojnë migrantë të dëbuar—kryesisht nga Kuba, Haiti, Nikaragua dhe Venezuela—të cilëve u është hequr statusi i përkohshëm ligjor në SHBA.
“Partnerët amerikanë dhe udhëheqësit rajonalë po punojnë ngushtë me ne për t’i dhënë fund krizës së migrimit të paligjshëm dhe masiv,” theksoi Departamenti i Shtetit, duke e cilësuar këtë politikë si një ndër prioritetet e administratës Trump.
Në përgjigje, autoritetet amerikane nënvizojnë se kthimi i shtetasve të huaj pa bazë ligjore në SHBA është thelbësor për sigurinë kombëtare, rendin publik dhe luftën kundër terrorizmit.
“Largimi nga SHBA-ja i të huajve, për të cilët ekzistojnë urdhra përfundimtarë për dëbim… i mbron Shtetet e Bashkuara nga terroristët e huaj dhe kërcënimet e tjera ndaj sigurisë kombëtare,” thuhet më tej në deklaratë.
Sipas raportimit të Bloomberg më 5 qershor, Uashingtoni ka intensifikuar përpjekjet për të bindur vendet e Ballkanit të pranojnë migrantët që dëbohen nga SHBA. Edhe Wall Street Journal kishte raportuar në muajin prill se opsionet që po shqyrtohen përfshijnë Kosovën, Moldavinë dhe vende të tjera të rajonit.
Në këtë drejtim, SHBA-të theksojnë se çdo shtet duhet të pranojë kthimin e shtetasve të vet që nuk kanë bazë ligjore për të qëndruar në territorin amerikan. Po ashtu, është lënë e hapur mundësia për bashkëpunim edhe me vende të treta për të pranuar migrantë nga vende të tjera.
“Në disa raste, mund të bashkëpunohet edhe me vende të tjera për të lehtësuar largimin nga Shtetet e Bashkuara të shtetasve të vendeve të treta që nuk kanë bazë ligjore për të qëndruar në SHBA,” nënvizon Departamenti i Shtetit.
Marrë nga Radio Evropa e Lirë
