Një raport zyrtar i vitit 1993 i Fondacioneve Soros tregon se Programi i Trajnimit të Menaxhimit të Fondacioneve Soros (Soros Foundations Management Training Program – SFMTP) ka nënshkruar një marrëveshje bashkëpunimi me Agjencinë e Shteteve të Bashkuara për Zhvillim Ndërkombëtar (USAID).
Sipas dokumentit, marrëveshja e bashkëpunimit me numër referencë EUR 0045 A 00 4007 00 është firmosur më 19 nëntor 1993 dhe kishte si qëllim financimin dhe zbatimin e një programi trajnimi dhe praktike profesionale për vende të Evropës Lindore dhe Qendrore.
Programi parashikonte ofrimin e tre muajve trajnim praktik dhe akademik në fusha si administrata publike, menaxhimi i biznesit, telekomunikacioni, menaxhimi mjedisor, bankat dhe financa. Në këtë program do të përfshiheshin 30 profesionistë nga Bullgaria, Estonia, Polonia, Rumania dhe Sllovakia.
Raporti thekson se menjëherë pas nënshkrimit të marrëveshjes, në të pesë vendet u nis procesi i reklamimit dhe rekrutimit të pjesëmarrësve. Reklamat u publikuan në gazeta kombëtare, ndërsa koordinatorët lokalë shpërndanë materiale aplikimi në institucione të ndryshme, përfshirë agjenci zhvillimi, projekte të financuara nga USAID, banka, kompani private, dhoma tregtie dhe shoqata biznesi.
Gjithashtu, në disa prej vendeve pjesëmarrëse, koordinatorët përdorën databaza ekzistuese me aplikime të para-seleksionuara nga fushata të mëparshme për trajnime ndërkombëtare.
Në raport përmendet edhe se stafi i programit në Shtetet e Bashkuara u njoh me procedurat e USAID dhe nisi rekrutimin e kompanive pritëse për pjesën e praktikës profesionale të programit.
Dokumenti është pjesë e një raporti tremujor performance për periudhën 1–31 dhjetor 1993 dhe paraqet aktivitetet organizative dhe administrative të programit, pa dhënë vlerësime politike apo ideologjike mbi qëllimet e tij.
Marrë nga Syri.net
