Pas nëntë muajsh protestash të vazhdueshme dhe rritjes së dhunës policore, presioni ndaj Presidentit serb Aleksandar Vuçiç po shtohet çdo ditë, raporton televizioni shtetëror austriak ORF. Artikulli thekson se Vuçiç po reagon me një strategji të dyfishtë, duke alternuar mes ofertave për dialog dhe shpalljes së “masave të mrekullueshme”, ndërsa njëkohësisht kërcënon me censurë dhe shtypje të ashpër ndaj kritikëve. Megjithatë, Bashkimi Evropian, sipas ORF, vijon të mbajë qëndrimin e tij abstenues.
Sipas medias austriake, protestat që nisën vitin e kaluar janë bërë gjithnjë e më të dhunshme, me përplasje mes demonstruesve, policisë dhe mbështetësve të maskuar të qeverisë. Në një fjalim televiziv të premten, Vuçiç u shpreh i gatshëm për bisedime me studentët dhe protestuesit antiqeveritarë, madje edhe në debate publike, por përfaqësuesit e tyre refuzuan kategorikisht: “Zjarrfikësit nuk ngatërrohen me zjarrvënës”, thanë ata, duke shtuar se do të dialogojnë vetëm gjatë fushatës zgjedhore.
Në të njëjtën kohë, shtypi kritik ndaj qeverisë gjendet nën presion të fortë. Vuçiç e ka quajtur televizionin N1 dhe Nova “platforma pushtuese mediatike” dhe ka akuzuar gazetat “Danas” e “Radar” për përhapje gënjeshtrash. Gazetarët janë bërë shpesh edhe viktima të dhunës gjatë protestave. “Pa median, autoritetet do të dëgjonin vetëm propagandë për sukseset dhe premtimet për masa të mrekullueshme”, shkruan ORF, duke cituar planin e Vuçiç për të ulur çmimet dhe normat e interesit nga 1 shtatori.
Qeveria serbe ka shtrënguar së fundi qasjen ndaj protestuesve, duke lejuar grupe mbështetësish të maskuar të sulmojnë manifestuesit në disa qytete. Revista “Vreme” e titulloi Vuçiçin si “President i të gjithë rrahësve serbë”, ndërsa analistë si Philipp Schwarm paralajmërojnë se presidenti po “shuan zjarrin me benzinë”.
Gazeta “Nova” shkruan se Vuçiç po synon gjendjen e jashtëzakonshme për të shmangur zgjedhjet, ndërsa media të tjera flasin për një zyrë të posaçme antiterrorizëm që do të përdorej kundër protestuesve. Eksperti i Evropës Juglindore, Vedran Džihić, tha për “Der Standard” se monopoli i shtetit mbi dhunën është shndërruar në “monopol mbi përhapjen e dhunës”, duke vënë në dukje se qeverisja e bazuar në frikë dhe dhunë është bërë parim themelor i pushtetit në Serbi.
Džihić dhe eurodeputeti austriak Andreas Schieder i kërkuan BE-së të mos heshtë më për situatën në Serbi, duke theksuar se një vend kandidat nuk mund të tolerojë dhunë të tillë ndaj qytetarëve dhe medias. Megjithatë, gjatë vizitës së kancelarit austriak Christian Stocker në Beograd, kritika për gjendjen politike mungoi. Përkundrazi, ai nënshkroi një marrëveshje bashkëpunimi ekonomik dhe i premtoi Vuçiçit mbështetje për rrugën evropiane të Serbisë.
Vuçiç vetë mohoi akuzat për autoritarizëm: “Unë nuk jam diktator”, deklaroi ai. Por protestat në rrugë, presioni ndaj medias dhe paralajmërimet për masa edhe më të ashpra lënë hapur pyetjen nëse Serbia do të mund të shmangë një përshkallëzim të mëtejshëm të krizës politike.
Marrë nga ORF.at
