Një rast i dyshuar i pastrimit të parave përmes blerjes së pasurive të paluajtshme nga një person me precedent penal në fushën e narkotikëve është zbuluar nga Agjencia e Inteligjencës Financiare. Veprimet identifikuan depozitime cash, transferta nga persona të tretë dhe dërgim fondesh jashtë Shqipërisë për blerje prone.
Sipas raportit të AIF të vitit 2025, shtetasi A ka kryer disa depozitime në llogarinë e tij bankare në vlerën totale prej 50,000 eurosh, të deklaruara si kursime personale. Përveç kësaj, ai ka përfituar edhe transferta nga persona të tretë në formë huaje ose dhurate, në vlerë totale 75,000 euro.
Nga verifikimet e kryera rezultoi se personat që kishin transferuar fondet nuk kishin lidhje familjare me shtetasin A, element që sipas AIF ka ngritur dyshime mbi natyrën reale të transaksioneve.
Raporti evidenton se nga analiza e lëvizjeve financiare rezultoi se shtetasi A transferoi shumën prej 120,000 eurosh në llogarinë e shtetasit B në një vend europian, me qëllim blerjen e një pasurie të paluajtshme.
Sipas verifikimeve të mëtejshme, AIF konstatoi se shtetasi A kishte ndryshuar gjeneralitetet dhe rezultonte person me precedent penal në fushën e narkotikëve.
Agjencia e Inteligjencës Financiare thekson se dyshimet kryesore lidhen me marrjen e huave ose dhuratave nga persona të tretë pa lidhje të evidentuara mes tyre, si edhe me transferimin e fondeve jashtë vendit për blerje të pasurive të paluajtshme.
Për shkak të këtyre elementeve, rasti u referua për hetime të mëtejshme pranë organeve ligjzbatuese.
Më tej, sipas raportit, autoritetet kanë informuar AIF se çështja është referuar në Prokurori për veprat penale “fshehje e të ardhurave” dhe “pastrim i produkteve të veprës penale ose veprimtarisë kriminale”.
Marrë nga Ekofin.al
