Banorët e Baks-Rrjollit në Velipojë vijuan sot protestën para Prokurorisë së Shkodrës, duke kundërshtuar me forcë zbatimin e projektit për ndërtimin e një resorti turistik në pronat e tyre.
Leja e ndërtimit të resortit turistik në Baks-Rrjoll është firmosur nga Belinda Balluku, ndërsa hetimet vijojnë, edhe pse çështja është në proces gjyqësor.
Banorët e Baks-Rrjollit shprehen të vendosur për të mbrojtur tokat e tyre.
“Katër breza, babë, gjysh, katragjysh, që jemi, na i solli këtu. Me thënë urdhna, zotni, këtu më ka lënë gjyshi, këtu më ka lënë baba, këtu kam blerë vetë, këtu kam pasur stërnipat. Ne i bëjmë një thirrje shtetit që ta vënë dorën në zemër, mos ta lëshojnë këtë popull në gjakderdhje. E keni parë edhe ju çfarë po bën policia tani dy ditë. Ne po rrimë më shumë në polici sesa te tokat tona. I bëjmë thirrje shtetit të na japë një rrugëzgjidhje, i bëjmë thirrje kësaj gjykate të na japë një rrugëzgjidhje.”
Një tjetër banore, Elena Pjeshka, tha për mediat se kjo që po ndodh është një padrejtësi.
“Axhat e mi, babai im, gjyshi im janë gjallë. Duam drejtësi! Ju lutem shumë. Kemi ardhur nga Anglia. Kam qenë sa kjo vajza kur kam shkuar me babain tim atje duke parë tokat tona, dhe sot nuk na lënë të ulemi atje poshtë. Duam drejtësi! Nuk na ndalon asgjë. Ajo toka është e jona. Axhat e mi janë duke qarë për tokën e tyre. Babai im ka qenë në tokë, e ka çuar ambulanca. Gjyshi im po e ha jetën nga mërzia. Këtu ka le, babai, gjyshi, stërgjyshi, katra stërgjyshi. Dhe sot na thonë se toka nuk është e jona. Duam drejtësi! Duam drejtësi! Duam drejtësi! Duam drejtësi! Të më përgjigjet shteti, i bëj thirrje Edi Ramës, policisë…”.
Më 6 shkurt, banorët ndaluan me forcë punonjësit e kompanisë të vazhdonin punimet, ndërsa përplasjet vazhduan edhe të shtunën, kur policia shoqëroi në komisariat disa prej banorëve. Pronarët legjitimë të tokave bëjnë të ditur se nuk do të tërhiqen nga protestat derisa projekti të pezullohet plotësisht.
Banorët kërkojnë takim me investitorin Bashkim Ulaj, ndërsa kushti i tyre është pezullimi i punimeve deri në gjetjen e një dakordësie. Mes atyre që po u merret prona janë edhe qytetarë nga Kosova, të cilët deklaruan se 25 vjet më parë kanë blerë tokë në këtë zonë. Kujtojmë se Bashkim Ulaj është edhe përfituesi më i madh i pasurive dhe parave publike, mbi 3 miliardë euro, dhe është pjesë e komunikimeve komprometuese mes Belinda Ballukut dhe ish-drejtorit të ARRSH-së, Evis Berberi, ku del në pah mekanizmi i ndarjes së tenderave si llokma dhe pazar për Bashkim Ulajn.
Marrë nga Syri.net
